10 март көнне Теләче авылында яшәүче Ралиф Хәниф улы Низаметдиновка 65 яшь тула

Хөрмәтле Ралиф Хәнифович! Сезне чын күңелдән матур гомер бәйрәмегез белән тәбрик итәбез. Бу юбилеегызны да Сез үзегезнең озак еллар дәвамында ил-көн алдында куйган намуслы, фидакарь хезмәтегез белән каршылыйсыз.

Сез төрле хезмәт баскычлары аша үтеп, классик язучыбыз Галимҗан Ибраһимовның “Тирән тамырлар” әсәрендә әйтелгәнчә, “тормышның төбеннән күтәрелеп” килдегез. Үзегезнең хезмәт биографиягездә сез хуҗалык хисапчысы хезмәтеннән башлап, күмәк хуҗалык рәисе, район авыл хуҗалыгы һәм азык-төлек идарәсе җитәкчесе кебек җаваплы вазифаларны башкардыгыз. Боларга ике ел дәвамында Совет армиясе сафларында кадровый офицер булып хезмәт итүегезне дә, аңарчы Лаеш совхоз-техникумында, Ульянов - Ленин исемендәге Казан Дәүләт Университетында милләтебезнең күренекле шәхесләре белән бергә белем алган данлы, шанлы студентлык елларын да өстәргә кирәк. 

Сез һөнәри осталыгыгыз, зур тәҗрибәгез,  эшкә җаваплы һәм намуслы каравыгыз белән барыбызга да үрнәк шәхес. Сезне районда, республикада киң эрудицияле, таләпчән, алынган хезмәтегезгә бөтен көчен бирә торган җитәкче буларак беләләр. Киләчәктә дә шушы күркәм сыйфатларга тугры булырсыз дип ышанып калабыз. 

Тормышта да сез үрнәк гаилә башлыгы, хәләл җефетегез Вәсилә ханымның ныклы таянычы, кызыгызга, улыгызга, кияүвегез белән киленегезгә һәм яраткан оныкларыгызга яраткан әти һәм дәү әти. Балаларыгызга югары белем, төпле тәрбия алу мөмкинлеге бирдегез, алар да сездәй тәртипле, тырыш һәм максатчан булып үстеләр. 

Сезгә бик яхшы сәламәтлек, һәрвакыт күтәренке кәеф, балаларыгыздан, оныкларыгыздан игелек күреп, Вәсилә ханым белән тигезлектә, озын, бәхетле гомер кичерүегезне телибез.

Туган көннәр ел да кабатлана,

Кабатланмый ләкин үткәне.

Ак бәхетләр, саулык - сәламәтлек

Алып килсен Сезгә көткәнне.

Без телибез Сезгә киләчәкнең

Ак бәхетләр алып килүен.

Без телибез Сезнең йөрәкнең гел

Яшим, яшим, дип тибүен.

Котлап Сезне туган көнегез белән

Нәрсә теләсәк тә аз сыман.

Гомерең озын булсын, шатлык белән

Гөрләп яшә матур яз сыман.

Ихтирам белән Сез җитәкләүче авыл хуҗалыгы предприятиеләре җитәкчеләре.