5 март көнне Алан урта мәктәбендә яңартылган музейны ачу тантанасы булды. Ике ел элек мәктәптә үткәрелгән капиталь ремонт вакытында музейга төзүчеләрнең кулы тими калган булган. - Ниһаять, бүген музеебыз икенче яшьлеген кичерә. Авылдашыбыз, шәхси эшмәкәр Хәким Һадиуллин гаиләсе химаясына без аны төзек, матур халәткә китерә алдык. Экспонатлар да музей җитәкчесе...
5 март көнне Алан урта мәктәбендә яңартылган музейны ачу тантанасы булды. Ике ел элек мәктәптә үткәрелгән капиталь ремонт вакытында музейга төзүчеләрнең кулы тими калган булган.
- Ниһаять, бүген музеебыз икенче яшьлеген кичерә. Авылдашыбыз, шәхси эшмәкәр Хәким Һадиуллин гаиләсе химаясына без аны төзек, матур халәткә китерә алдык. Экспонатлар да музей җитәкчесе Гөлсинә Кыямова тарафыннан зәвыклы, тематик яктан яңгырашлы итеп урнаштырылды. Сөенечебез чиксез зур. Музейны сафка бастыруда үз көчләрен кызганмаган Һадиуллиннар гаиләсенә, авылдашларга һәм укытучыларга, укучыларга ихлас рәхмәтемне җиткерәм. Алга таба ул теләп, сагынып килә торган урынга әверелсен. Музейның ишекләре һәркем өчен ачык, - диде ачылыш тантанасында Алан урта мәктәбе директоры Наил Хәсәнов.
Бу көнне аланлыларның сөенечен муниципаль район башкарма комитеты җитәкчесенең социаль мәсьәләләр буенча урынбасары Альфред Шәйдуллин, район мәгариф бүлеге җитәкчесе Наталья Карпова, район ветераннар Советы рәисе Мансур Газизов һәм Алан авылы җирлеге башлыгы Әхмәт Хаҗиев уртаклашты. Алар укучылар, авыл халкы алдында чыгыш ясадылар. Соңгысы даими иганәчелек эшчәнлеге өчен шәхси эшмәкәр Хәким Һадиуллинга җирлекнең иң олы бүләген - Рәхмәт хатын тапшырды. Чыгышлар Алан урта мәктәбе укучыларының җырлары, биюләре, нәфис сүзләре белән үрелеп барды.
Бөек Ватан сугышында катнашып, күп батырлыклар күрсәткән Әхмәдулла Хафизовның тормыш юлы һәм үзе исән чакта язып алып калынган истәлекләре белән аның оныгы Әлфия Гайнуллина таныштырды. Әхмәдулла Хафизов белән Тимершәех Нәҗметдиновларның орден-медальләре, киемнәре, шәхси әйберләре музейның күренекле җирендә урын алган. Музейда авылның тарихын, колхозлашу, Бөек Ватан сугышы елларын һәм хәзерге чорны, данлы шәхесләрнең тормыш юлын, мәктәп тарихын чагылдырган бүлекләр булдырылган. Шулай ук Коммунистлар партиясе тарихы һәм Ленин шәхесе белән бәйле экспонатлар да биредә лаеклы урын алган.
- Алга таба да без укучылар, укытучылар һәм авыл халкы ярдәме белән яңартылган музейны тагын да кызыклырак мәгълүматлар белән баетырбыз дип, ышанып калам. Кайчандыр безнең яраткан укытучыларыбыз Рафис Зарипов, Фәсхетдин Фәттахов, Ләлә Зәйнетдинова һәм укучылар Советы башлап җибәргән эшне лаеклы дәвам итәргә ниятлибез. Хәзер моның өчен шартлар да, мөмкинлекләр дә бар, - дип белдерде яңартылган музейда тәүге экскурсиясен үткәргән Гөлсинә Кыямова.
Фәнил Нигъмәтҗанов
Автор фотолары.
Иң мөһим һәм кызыклы язмаларны Татмедиа Telegram-каналында укыгыз
