Балалар да, әби-бабайлар да сөенде
27 апрель көнне районыбызда зур кунаклар булып китте. Алар - Төрекмәнстаннан килгән дин кардәшләребез - делегация җитәкчесе, Төрекмәнстан Мәҗлесе рәисе урынбасары Гөрбәнгөл Бәйрәмова һәм Мәҗлес әгъзалары - Әхмәд Чарыев, Дҗөрәгөл Халбаева, Язморад Какагильдиев һәм Рәсүл Ходҗаевлар.
Аларны ТР Дәүләт Советы депутаты, хокук һәм закончалыкны саклау комитеты рәисе Шакир Яһүдин, муниципаль район башлыгы Илдус Зарипов һәм аның ярдәмчеләре озата йөрде. Шулай ук бу көнне районда узган тантаналарда ТР Президентының социаль мәсьәләләр буенча ярдәмчесе Ләйлә Фазлыева, ТР Ветераннар Советы рәисе Хәбир Иштирәков, ТР Дәүләт Советында фракцияләрнең эшчәнлеген тәэмин итү бүлеге төп киңәшчесе Руслан Хәйруллиннар да катнашты.
Беренче тукталыш буларак кунакларга Теләче сәнәгать мәйданчыгы, аның тәрҗемәи хәле һәм үсеш переспективалары тәкъдим ителде. Биредә резидентларның эшчәнлеге аларда зур кызыксыну уятты. Дин кардәшләребез тарафыннан бирелгән күпсанлы сораулар шул хакта сөйли.
Икенче тукталыш - Иске Җөри авылында күп балалы Гыйльметдиновлар гаиләсендә узды. Биредә без куанычлы мизгелләрнең шаһитлары булдык. Әлеге гаиләгә ТР Президенты бүләге - "Форд-Транзит" микроавтобусы бүләк ителде. Машина ачкычын балаларның әниләре Мәликә ханымга ТР Президенты ярдәмчесе Ләйлә Фазлыева тапшырды. Күпсанлы бүләкләр, уенчыклар кабул итеп алганнан соң әлеге гаилә аллы-гөлле шарлар эленгән яңа автомобильдә урам әйләнде. Тантанада республиканың танылган дин әһелләре, җәмәгать эшлеклеләре авыл халкы катнашты.
Өченче тукталышта - Теләче авылында төзекләндерелгән Ветераннар йортын ачуда катнаштык. Әлеге бүләк өчен район ветераннар Советы рәисе Мансур Газизов өлкәннәребез исеменнән район башлыгы Илдус Зариповка чиксез рхмәтен белдерде. Өлкәннәребез генә түгел, тантанага җыелган район активы да бу минутларда икеләтә куанычлы хисләр кичергәндер. Бөек Җиңүнең 70 еллыгы якынлашкан бу көннәрдә ветераннарыбызга зу бүләк булды ул. Район финанс ярдәме белән, җаваплылыгы чикләнгән "Максат" ширкәте төзүчеләре тарафыннан төзекләндерелгән әлеге бина озын гомерле булсын да, өлкәннәребезнең күңелен гел яшәртеп, рухландырып торсын. Болар очен биредә бөтен уңайлыклар тудырылган. Тантана кунакларның изге теләге һәм "Сударушка" рус фольклор ансамбленең җырлары белән үрелеп барылды.
Дүртенче һәм бишенче тукталышлар - Максабаш һәм Югары Кибәхуҗа авылларында республика программасы нигезендә төзелгән башлангыч мәктәп һәм мәдәният йорты биналарында узды. Әлеге торак пунктларда кунаклар химаячыларның матди ярдәме белән Ватан азатлыгы өчен башын салган райондашларыбыз истәлегенә төзелгән обелискларга чәчәкләр салдылар. Азактан Югары Кибәхуҗа урта мәктәбе укучылары тарафыннан концерт күрсәтелде.
Алтынчы тукталышта кунаклар Теләче туган якны өйрәнү музеенда булып, районыбызның тарихын чагылдырган, каһарманнарны, танылган шәхесләрне зурлаган экспонатлар белән таныштылар, тәкъдимнәр китабына теләкләрен язып калдырдылар. Бер ел дәвамында Теләчедә эшләп килүче күпфункцияле үзәкнең эшчәнлеге дә кунаклар өчен зур яңалык буларак кабул ителде.
Җиденче тукталыш буларак кунакларга Сәгыйть Гыйниятуллинның крестьян-фермер хуҗалыгы күрсәтелде. Чиста токымлы нәселле атлар үрчетүче әлеге хуҗалык кунакларны аеруча кызыксындырды. Чөнки Төрекмәнстанда ат изге хайван булып санала.
Берничә ел элек кенә төзелүенә карамастан, республика, ил, дөньякүләм ярышлар үткәреп өлгергән "Батыр" спорт комплексы да кунакларда фәкать соклану хисләре генә уятты. Сигезенче тукталыш булган бинада алар районда, республикада танылу алган яшь спортчылар белән таныштылар, тренерларның эш алымнарын өйрәнделәр.
Кыскасы, Төрекмәнстанннан килгән кунаклар безгә кояшлы көннәр алып килеп, районыбызда үткәргән сәфәрләреннән канәгать калдылар, алга таба да районыбыз халкының тыныч, мул тормышта яшәвен теләделәр.
Фәнил Гаязов.
Автор фотосы.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84