“Энергосбыт” оешмасы җитәкчесе Данил Мөхәммәт улы Фазлыев белән бәйрәм алды әңгәмәсе

Берничә көннән районыбыз энергетиклары үзләренең һөнәри бәйрәмнәрен билгеләп үтәчәкләр. Әлеге бәйрәм район электр челтәре коллективы белән "Энергосбыт" оешмасының уртак бәйрәме. Шушы уңайдан без "Энергосбыт" оешмасы җитәкчесе Данил Мөхәммәт улы Фазлыев белән бәйрәм алды әңгәмәсе корып алдык.

- Данил Мөхәммәтович, сезне һәм сез җитәк-ләгән коллективны якынлашып килүче Яңа ел бәйрәме белән тәбрик итәм. Иң элек коллективыгыз һәм үзегезнең хезмәтегез турында сөйләп китсәгез иде?

- Ихлас тәбрикләүләрегез өчен зур рәхмәт. Хезмәт коллективыбыз зур түгел, коллективта биш кеше эшлибез. Безнең хезмәт вазифабыз юридик һәм физик затлар белән килешү төзеп, аларны төзелгән килешү нигезендә электр энергиясе белән тәэмин итү һәм кулланылган электр энергиясе өчен түләүләр кабул итүдән гыйбарәт. Физик яки юридик затның электр энергиясеннән файдаланырга хокукы барлыгын раслаучы барлык документлары булгач кына без район электр челтәренә монтажлау эшләрен башларга рөхсәт кәгазе җибәрәбез.

Күпләр беләдер, оешмабыз Теләче авылының Тукай урамына урнашкан. Офисыбызда үзебез өчен дә, теге яки бу сорау һәм йомыш белән килгән кулланучылар өчен дә бөтен уңай шартлар булдырылган. Коллективыбызда югары белемле, үз эшләренең осталарына әверелгән белгечләр эшли. Алар: инженер Фәнил Гыйләҗев, техник Олеся Гозәерова, төп физик затлар белән эшләүче өлкән агент Альмир Закиров, машина йөртүче Эдуард Козловлар.

- Гади обывательләрчә фикер йөрсәк, хезмәте-гез акча җыюга гына корылган кебек...

- Бер караганда бу шулай. Әмма белгечләребезнең эшләре бик катлаулы, бездә күп төрле килешүләр төзелә, исәп-хисап, аңлату эшләре алып барыла. Моннан тыш, урыннарга барып, чишелеш таләп иткән мәсьәләләрне дә хәл итәргә туры килә. Әлеге тырыш һәм фидакарь хезмәтебезнең нәтиҗәсе буларак, безнең филиал 52 төрдәш оешма арасында алып барылган рейтингта беренче бишлектә тора. Әлеге рейтинг 12 күрсәткеч буенча төзелә.

- Сез турыдан-туры халык белән эшли торган оешма. Эш дәверендә ризасызлык белдереп килүчеләр дә юк түгелдер...

- Әлбәттә, бу шулай. Акча сорап кергән кешене кем яратып бетерер икән?! Әмма кулланучылар белән ике арада булган аңлашылмаучанлыклар көннән-көн кими бара. Әкренләп булса да Европа һәм дөньякүләм стандартларга атлыйбыз. Абонентлар нинди генә кәеф белән килмәсен, без аларны якты йөз, яхшы мөгаләмә белән каршы алабыз. Без килешү нигезендә 140 юридик, 5 мең физик зат белән эшлибез.

- 2014 елда районда зур җитештерү объекты - сәнәгать мәйданчыгы ачылды. Республикакүләм танылу алган мәйданчык бүген дә зур үсеш юлында.

- 2014 елда Теләче сәнәгать мәйданчыгы 8 мең киловатт-сәгать электр энергиясе кулланылса, бүген биредә 240 мең киловатт-сәгать электр энергиясе тотыла. Бу алдагы ел белән чагыштырганда куллану 30 тапкырга артыграк дигән сүз. Зур җитештерү объекты булса да, биредә дә электр энергиясен сак куллану җаен карыйлар.

- Ике төрле оешма булсагыз да, сез район электр челтәре белән бергә бер бурычны үтисез. Сезнең алда кулланучыларны бер-өзлексез сыйфатлы электр энергиясе белән тәэмин итү бурычы куелган.

- Бер-беребез белән һәрвакыт аңлашып эшләргә тырышабыз. Хезмәт белән бәйле авырлыкларны бергәләп җиңәбез. Район электр челтәре, үзебезнең хезмәткәрләрне һәм хөрмәтле кулланучыларыбызны якынлашып килүче Яңа ел бәйрәме белән тәбрик итәм. Киләсе елда да һәркайсыбызның өе якты һәм җылы булсын. Райондашларыбызның барчасына исәнлек-саулык, хезмәт уңышлары һәм гаилә бәхете телим.

Әңгәмәдәш - Фәнил Нигъмәтҗанов
Автор фотосы

Реклама