26 апрель көнне Татарстанда - туган тел көне билгеләп үтеләчәк. Әлеге көн беренче чиратта бөек шагыйребез Габдулла Тукайның туган көне белән дә бәйле. Бу көн һәркайсыбызның күңелендә аерым урын биләп тора. Асылда ул күпмилләтле Татарстан җәмәгатьчелегенең туган телгә - беркайчан да тутыкмас рухи ядкаребезгә, мәңгелек мәдәни мирасыбызга булган ихтирамның бер...
Туган телен белмәгән кеше үз халкыннан да, милли тамырларыннан да аерыла, туган җирендә дә ят була. Мондый вәзгыять бик аяныч. Йөздән артык халык вәкиле дус һәм тату яшәгән Татарстанда күптеллелекне гамәлгә ашыру буенча күп эшләнә. Республика җитәкчелеге һәркем үзен уңай хис итсен, туган телен белсен һәм туган телендә сөйләшә алсын өчен бөтен мөмкинлекләрне дә тудырырга тырыша.
Һәр милләт вәкиленә дә үз теле, үз дине якын. Безнең районда да күп төрле милләт вәкилләре үзара дустанә мөнәсәбәттә яши. Нинди генә бәйрәм, милли йола, гореф-гадәтләргә кагылышлы чара булмасын, район халкы барысында да актив катнаша. Районда Раштуа, Гает, Рамазан, Качману, Сабантуй бәйрәмнәре матур уза.
Татарстан - аерым миссия башкаручы, күп гасырлардан килүче милләт һәм конфессияара дөнья тәҗрибәсен саклаучы төбәк. Ә бу үз чиратында республиканың үсүендә һәм уңышка ирешеүендә стабильлекнең нигезе булып тора. Татарстанның үсешендә шулай ук төп рольне гореф-гадәтләрнең, мәдәниятнең, этнос һәм конфессияләрнең толерантлы һәм гармонияле бәйләнеше дә уйный. Районыбызда үткән бер генә чара да татарлар, я булмаса руслар катнашында гына узмый. Ә киресенчә, барлык төр милләт вәкилләре дә үз өлешләрен кертә әлеге чараларда. Район үзәкләштерелгән китапханәләр челтәре җи-тәкчесе Резидә Дәүлиева да шул турыда ассызыклый:
- Район китапханәсе ул барлык төр милләт вәкилләрен бәйләп торучы учак дияр идем. Китапханә тарафыннан нинди генә конкурс-бәйгеләр оештырылмасын, районда яшәүче барлык төр милләт вәкилләре дә бик теләп катнаша аларда. Туган тел һәркайсыбыз өчен кадерле, һәм аны мөмкин кадәр сакларга тиешбез.
Субаш авылында яшәүче Зоя Павлованы районда белмәүчеләр сирәктер. "Нардуган" керәшен фольклор ансамбле җитәкчесе, керәшеннәрнең гореф-гадәтләре белән җирле радио аша таныштыручы да ул. Ел башында авылларда үтүче авыл җыеннары да бу ансамбльнең чыгышларыннан башка узмый.
- Теләче төбәге эшчән, тырыш булдыклы, күпмилләт-ле халкы белән мактаулы. Биредә дөньяга килгән һәм бүген фидакарь хезмәт, намус белән көн күрүче һәр милләт кешесе, үзенең күңел түрендә, йөрәгендә, туган ягына карата иң саф, самими хисләрен кадерләп саклый. Газиз туган теленә гаять дәрәҗәдә игътибарлы ул. Без - гасырлар дәвамында тупланган матди һәм рухи хәзинәне, мирасны киләчәк буыннарга җиткерүдә зур тырышлык куябыз. Изге бәйрәмнәребез оешкан төстә үтә. Гореф-гадәт йолаларыбыз бүген дә саклана безнең. Зур чаралар үткәргәндә район хакимиятенең игътирамын, теләктәшлеген тоеп, дус һәм тату яшибез, - ди Зоя ханым.
Күптән түгел район үзәге Теләчедә борынгы чиркәүгә гөмбәз куелды. Әлеге чара зур тантанага әйләнде. Биш вакыт намазга дәшеп мәчеттән азан тавышы яңгыраса, тиздән чиркәүдә чаң сугарлар дигән ышаныч бар. Туган тел көне дә - күпмилләтле Татарстан халкы өчен һәрвакытта да тынычлык, татулык һәм дуслык бәйрәменә әйләнсен иде!
Лилия Шәйхиева
