Соңгы вакытта Шәтке авылы куанычлы хисләр белән яши. Күптән түгел генә биредә тантаналы шартларда яңа модульле ветеринария участок пункты ачып кайтсак, 19 август көнне республикабыз лидеры Рөстәм Миңнеханов программасы нигезендә 50 балага исәпләп төзелгән яңа балалар бакчасы бинасын ачуның шаһиты булдык.
Шәтке халык күп һәм тыгыз яши торган авылларның берсе....
Балалар бакчасын ачу тантанасында авыл халкы һәм район активы белән берлектә ТР Фән һәм мәгариф министры Энгель Фәттахов, ТР Дәүләт Советы депутатлары - Камил Садретдинов, Разыя Садыйкова, муниципаль район башлыгы Илдус Зарипов та катнашты һәм шәткеләрнең зур шатлыклары белән уртаклаштылар.
- Шәтке авылы халкы, биредә тәрбияләнәчәк балалар мондый затлы, мәһабәт бинага бик тә лаек. Чөнки биредә уңган-булган, тырыш халык яши. Шуңа күрә халык та, хуҗалык та бай, җитеш тормышта көн күрә. Билгеле ки, Шәтке төбәген хоккейдан башка күз алдына да китереп булмый. Без авылда яшьләрнең, балаларның күп булуына нык сөенбез. Бу авылның матур киләчәге бар дигән сүз. Бакчалар ачылып торганда, әти-әниләр дә авылдагы демографик хәлне уңай якка үзгәртерләр дигән ышаныч бар, - дип муниципаль район башлыгы Илдус Зарипов. Чыгышын тәмалап ул, яңа пунктны төзеп файдалануга тапшыруда башлап йөргән, рухи һәм матди ярдәм иткән иптәшләргә - авыл мулласы Фәрит Шәйхиевка, җаваплылыгы чикләнгән "АгроЛак" ширкәте җитәкчесе Илдуз Гайнуллинга, Шәтке авыл җирлеге башлыгы Фәрит Кадыйровка муниципаль район башлыгының Рәхмәт хатларын тапшырды, җаваплылыгы чикләнгән "Цереком" ширкәте төзүчеләренә рәхмәт белдерде.
Ә ТР Фән һәм мәгариф министры Энгель Фәттахов кулыннан 100 мең сумга исәпләнгән сертификатны 24 ел дәвамында балалар бакчасы мөдире булып эшләгән Гөлнирә Шәйхиева кабул итеп алды. Республикабызның баш укытучысы үзенең чыгышында хәзер балалар бакчаларының балаларны вакытлыча куеп тору урыны гына түгел икәнлеген, ә тәрбия һәм белем бирү үзәге булырга тиешлеген ассызыклады. Чыннан да, хәзер яшьләребез ике ВУЗ тәмамласалар да, эш таба алмый торганга әйләнде.
- Бу уңайдан илебез мәгарифе тамырдан үзгәреш кичерә. Хәзер без балаларны эшче һөнәренә өйрәтүне бурыч итеп куябыз. Гомум белем бирү мәктәпләре белән беррәттән, һөнәри белем бирү йортларында да белем бирү тәртибе тамырдан үзгәрәчәк. 2019 елда Казанда узачак эшче һөнәрләре чемпионаты да моңа зур этәргеч бирер дип уйлыйбыз. Ә белем һәм тәрбия бирү өлкәсендәге үзгәрешләр балалар бакчаларыннан, аларда хезмәт куючы тәрбияче-педагоглардан башланырга тиеш, - диде ул.
Авылда яңа балалар бакчасы бинасы ачылу шәткеләр өчен чыннан да зур куаныч. Чөнки моңарчы авыл балалары авыл читендәге иске, уңайлыклары булмаган бинада тәрбияләнгән. И сөенде инде бу көнне шәткеләр.
Сәлимә Мөхәммәтханова:
- Авыл кешесе күптән көтте бу бәхетне. Яңа бакчага өченче оныгым Айбулат йөриячәк. Ике абыйсы мәктәптә укый инде. Шундый бәхеткә тиендергәннәре өчен республика, район, җирлек җитәкчеләренә зур рәхмәт.
Дамира Якупова:
- Олы оныгым Айзилә бакчага йөри инде, кечкенәсе - Айгизәсе Яңа елдан соң йөри башлаячак. Чиратка язылдык инде. Без балалар үстергәндә мондый бакчалар булмады шул. Эшкә киткәндә ашарларына калдырып, балаларны өйдә бикләп китә идек. Үзем 33 ел буе фермада эшләдем. Яңа бакчаның авыл уртасында булуы уңайлы. Алайса, искесе авыл читендә иде. Анда бала илтеп, алып кайтырга әти-әниләрнең шактый вакыты үтте.
Ирле-хатынлы Сөембикә һәм Миннәхмәт Газизҗановлар:
- Яңа бакчага оныкларыбыз йөрмәсә дә, аны ачу тантасыны зур рухлану хисләре белән килдек. Яңа бина авылны бизәп, яшәртеп, яңа мәдәни үзәк булып торачак бит. Тагын, тагын төзергә, яңартырга насыйп булсын.
Фәнил Нигъмәтҗанов.
