Кабат көрәшчеләр кабул иттек
Бу юлы ир-атлар һәм хатын-кызлар өчен билбау көрәше буенча ярышу мөмкинлеге тудырылды. 20-21 февраль көннәрендә "Батыр" спорткомплексында Россиянең атказанган тренерлары Мәгаз Сәхәбетдинов белән Әсгать Шәйхетдинов призына 11 нче Бөтенроссия турниры үткәрелде.
Күреп, ишетеп торабыз, соңгы елларда республикабызда милли көрәшебезгә якын булган спорт төре аеруча популярлаша башлады. Кулына сөлге алып караган малайлардан башлап, зур келәмнәрдә мәйдан тоткан батырларга кадәр үзләрен әлеге көрәштә сынап карарга тырыша. Чөнки билбау көрәше аша үзеңне дөнья күләмендә танытырга була.
Россиякүләм турнир-ның кабаттан Теләчедә үткәрелүе тикмәгә генә түгел. Беренчедән, районда бер дигән спорт корылмасы, ярышларны уздыру өчен шартлар бар. Икенчедән, биредә татар-башкорт һәм билбау көрәше белән теләп, яратып шөгыльләнәләр. Өченчедән, кунакчыл төбәк без.
Бу юлы турнирда барлыгы 118 көрәшче катнашты. Алар арасында Казахстан, Таҗикстан илләреннән, Мордовия, Башкортстан, Марий-Эл республикаларыннан, Түбән Новгород, Әстерхан, Ульян өлкәсеннән, Ставрополь краеннан килгән көрәшчеләр дә бар иде.
- Әлеге турнир унберенче ел рәттән уңышлы үткәрелеп килә. Ярышка җиңү дәрте белән килгән көрәшчеләрне күрү үзе үк күңелле. Биредә алар көрәшеп югары нәтиҗәләргә ирешеп, Россиянең спорт остасы исеменә лаек булалар. Теләче спорт үсеше, аеруча көрәш төре буенча яхшы күрсәткечкә ия төбәк. Теләчелеләр бу бәйгене дөньякүләм ярышлар дәрәҗәсендә, зур оешканлык белән уздыра. Шуның өчен дә ихлас рәхмәтемне белдерәм, - диде ярышларны ачу тантанасында Татарстан Республикасы Премьер-министры урынбасары -авыл хуҗалыгы һәм азык-төлек министры, республикабызның билбау көрәше федерациясе президенты Марат Әхмәтов.
Ошбу турнир республикада 2005 елдан бирле үткәрелеп килә. Аның ике данлы көрәшчебез призына үткәрелүе тикмәгә түгел. Бу аларның исемнәрен мәңгеләштерү максатыннан эшләнә. Алар республкабызның гына түгел, совет спортының легендалары. Алар тарафыннан йөзләгән көрәшче тәрбияләнгән, бүген аларның күбесе тренерлык эше белән шөгыльләнә. Шәкертләре арасында башка һөнәр ияләре - район башлыклары, танылган эшмәкәрләр һәм банкирлар да бар.
Билбау көрәше классик һәм ирекле стильгә бүленә. Көндәшен күтәреп алып, аркага салуны хуплаучы татар-башкорт милләтеннән булганнар өчен, билбау көрәшенең классик төре кулай. Ә аяк чалу, төртеп егу кебек алымнар ирекле стильдә еш кулланыла. Шунысын да әйтеп үтәргә кирәк: билбау көрәшенең ирекле стилендә кызлар да катнаша.
Теләчедә узган Бөтенроссия турнирында классик стильдә бил алышкан ир-атлар арасында райондашыбыз Динар Кәримуллин 68 килограммга кадәр үлчәү авырлыгында көрәшеп чемпион исеменә лаек булды. 82 килограммга кадәр үлчәү авырлыгында бил алышкан Илназ Камалиев икенче урынны яулады. 100 килограммга кадәр үлчәү авырлыгында көч сынашкан Раил Нургалиев белән Раил Мараков беренче һәм икенче урыннарны бүлеште. 100 килограммнан югары үлчәүдә бил алышкан Рамил Корбанов икенче урынга лаек булды.
Ирекле стильдә көрәшеп җиңү яулаучылар арасында да райондашларыбыз байтак булды. 68 килограммга кадәр үлчәү авылыгында бил алышкан Азат Нурмөхәммәтов өченче урынга чыкты. 82 килограммга кадәр булган көрәшчеләр арасында Илдар Гыйниятуллинга тиңнәр булмады. 100 килогаммга кадәр үлчәү авылыгында көрәшкән Муса Галләмов та чемпион исеменә лаек булды. Бу үлчәү авырлыгында көч сынашкан Илдар Мараков өченче урынны яулады. 100 килограммнан югары үлчәүдә көрәшкән Зөлфәт Ибраһимов та өченче батыр калды.
Ирекле төрдә генә чыгыш ясаган хатын-кызлар арасында 52 килограммга кадәр үлчәү авырлыгында көрәшкән Ләйсән Тихонова өченче, 68 килограммга кадәр үлчәү авырлыгында көч сынашкан Екатерина Гыйниятуллина беренче урынга лаек булды.
Фәнил Нигъмәтҗанов.
Иң мөһим һәм кызыклы язмаларны Татмедиа Telegram-каналында укыгыз
Телефон АО «ТАТМЕДИА»: (843) 222 09 84