Теләче Информ

Кар-яңгырдан курыкмыйча...

Казанда шимбә-ял көннәрендә авыл хуҗалыгы ярминкәләре гөрли. 23 октябрь көнне районыбыз җитештерүчеләре кар-яңгырдан курыкмыйча, Казан шәһәренең Татарстан урамы белән Тинчурин урамы кисешкән чатта сәүдә итте. Бу юлы да авыл хуҗалыгы предприятиеләре, авыл җирлекләре продукцияләрен шәһәр халкы хозурына чыгарды.

Көзге ярминкәдә яңа суйган терлек итенә, яңа сауган авыл сөтенә, ашлыкка, фуражга сорау зур булды. Мәсәлән, сөт ризыкларын - җаваплылыклары чикләнгән "Агролак", "Игенче", "Нирус" ширкәтләре, итне - "Сөт иле-Теләче" агрофирмасы, җаваплылыгы чикләнгән "Тукаш" ширкәте куйган сәүдә өстәлләреннән чират торып алдылар. Моннан тыш, райондашларыбыз, төрле кайнатмалар, тозлыклар, таба ашлары, кул эшләре һәм балан, миләш, гөмбә кебек көз нигъмәтләре белән дә сәүдә итте. Казаннарның күңеленә аеруча Әбде авыл җирлеге җитештерүчеләре алып килгән тозлыклар хуш килде. "Хәкимова" шәхси предприятиесендә җитештерелгән таба ашлары яныннан кемнәр генә битараф китә алды икән?! Ярминкәгә килүчеләр камыр ризыгы өелеп торучы күз явын алырдай өстәлдән ни дә булса сатып алырга мәҗбүр булгандыр. Кул эшләренә, бигрәк тә йон оекбаш, бияләй бәйләргә Кече Кибәхуҗа авыл җирлегендә яшәүчеләр һәвәс икән. Килгән саен көлтәсе белән йон оекбашлар алып киләләр. Сөенечкә булсын, ярминкәгә һәр килүдә оекбашларын сатып бетереп диярлек кайтып китәләр. Авыл әби-апайлары бәйләгән оекбашка, бияләйгә үзеңнең бакчаңда үстерелгән җиләк-җимешкә, яшелчәгә җитәме соң?! Шуңа да казаннар иртәнге алтыдан ук чагыштырмача арзанлы, сыйфатлы һәм экологик яктан чиста продукция алып калырга тырышты. Алдагы елларда сорау әлләни зур булмаган бөртекле культураларны һәм фуражны машиналар килеп туктауга ук алып бетерделәр. Бу уңайдан җаваплылыгы чикләнгән "Игенче", "Нирус" һәм "Агролак" ширкәте җитештерүчеләре мактана ала. Иртәнге тугызлар тирәсенә әлеге ширкәтләрнең машина әрҗәләре бушап калган иде. Ә менә икенче икмәгебез саналган бәрәңге тирәсендә әлләни ыгы-зыгы, активлык күзәтелмәде. "Шулай да алучылар байтак", - дип белдерделәр Ачы һәм Баландыш авылларында бәрәңге игү белән шөгыльләнүче фермерлар Айнур Гобәйдуллин белән Фәнис Җәләлиевләрнең бәрәңге сату белән мәшгуль булган вәкилләре. Быел бәрәңге әлеге хуҗалыкларда гына түгел, шәхси секторда да ишелеп уңды. Сөенече генә түгел, көенече дә бар икән. Сораштыруларым буенча, быел бәрәңге чери икән. Шуңа да карамастан, халык оптимистик рухта калып: "Калганы җитәр әле" - ди.
Күзәтүләремнән күренгәнчә, шәһәр халкы районыбыз җитештерүчеләренә рәхмәтле булып калды. Икмәген, сөтен, кишер, бәрәңгесен сатып бетереп кайтып киткән хуҗалыклар турында әйтәсе дә юк инде. Уенын-чынын бергә кушып әйткәндә, беришләре икмәк-фуражны амбар тычканнары белән бергә сатты. Сөенечләре эчләренә сыймагандыр. Хәер, аларның алтын йомырка тоткандай, учтагы акчага карап, хисләнеп утырырга вакытлары юк. Чөнки авыл хуҗалыгы ярминкәләре Казанда ел азагына кадәр дәвам итәчәк. Районыбыз җитештерүчеләре алга таба да ике атнага бер калага йөриячәк. Фәкать сатар продукцияләре генә булсын. Аларны киләсе атнага Әтнә җитештерүчеләре алыштырачак.
Фәнил Гаязов.
Автор фотосы.

Нравится
Поделиться:
Реклама
Комментарии (0)
Осталось символов: