Агымдагы елның 1 апреленнән районда "Санитар-Чисталык" икеайлыгы игълан ителде. Ул 1 июньгә кадәр дәвам итәчәк. Бу хакта 23 март 2015 елда Теләче муниципаль районының Башкарма комитеты җитәкчесе карары кабул ителде.
Аның барышында эрегән кар астыннан чыккан чүп-чарны чистарту, тирә-юньне тәртипкә китерү күздә тотыла. Муниципаль районның авыл җирлекләрен төзекләндерү һәм аларда тәртип, чисталык урнаштыру максатыннан авыл биләмәләрен санитар карау кагыйдәләре кабул ителгән. Аларда төзекләндерү өлкәсендә бердәм таләпләр куелган, торак пунктлар, шул исәптән биналар, корылмалар, биләмәләрен җыештыру тәртибе билгеләнгән. Кагыйдәләрне бозуда гаеплеләр ТР Административ хокук бозулар турындагы кодексның 3.6 маддәсе буенча административ җаваплылыкка тартыла.
Теләче муниципаль районынын Административ комиссия утырышында еш кына төзекләндерү Кагыйдәләрнең 8.6.5 пункты буенча төзелгән административ хокук бозу турында эшләрне карарга туры килә. Кагыйдәләр нигезендә: тротуар, газон һәм урамнарда машина тотарга махсус каралмаган урыннарда автотранспорт чараларын тоту тыела. Шулай ук өй һәм хуҗалык биләмәләреннән тыш утын, печән, салам, хуҗалык эшчәнлеге нәтиҗәсендә барлыкка килгән җитештерү, төзелеш, көнкүреш калдыкларын вакытлыча җыеп саклау, урамнарга чыгарып ташлау, юлларга су агызу, өй һәм хуҗалык тирәсендә рөхсәтсез вак хуҗалык корылмаларын төзү, капка төбендә төзү материалларын саклау тыела. Административ хокук бозган оешма 200 000 сумнан алып 500 000 сумга кадәр штрафка тартылырга мөмкин. Вазыйфаи затлар өчен штрафның күләме 15000-30000 сум. Физик затлар очен 2000-3500 сум штраф каралган. Татарсан Республикасы Кодексында "кисәтү" кебек чара хәзер гамәлдә юк. Штраф салынганнан соң бер ел эчендә административ хокук бозу кабатланса, штраф күләме югары була. Оешма өчен - 500 меңнән 1 млн.га кадәр; вазыйфаи затлар өчен - 30 меңнән 50 меңгә кадәр; физик затлар өчен 3500 дән 5000 гә кадәр штраф салыначак.
«Санитар-Чисталык» икеайлыгы барышында барыбыз бердәм көч белән өй, хуҗалык тирәләрен, елга һәм инеш буйларын, күпләп ял итү урыннарын җыештырып тәртипләсәк иде. Әйләнә-тирәбездә чисталык һәм матурлык булдыру бары тик безнең кулларда. Санитар икеайлык барышында булган сораулар, хокук бозу очраклары буенча Теләче муниципаль районының Административ комиссиясенә мөрәҗәгать итә алалар.
Тел.: (84360) 2-11-83, (84360) 2-18-67.E-mail: Telache@tatar.ru
