Теләче Информ

Халык белмәсә, балык белер

Узган атнада республикабызда "Президентыбыз белән бергә" дип исемләнгән республика иҗтимагый хәрәкәте җитәкчелегендә "Язгы шәфкатьлелек атналыгы" республика хәйрия акциясе булып үтте.

Исегезгә төшерәбез: әлеге эш-гамәлләр республика башлыгы Рөстәм Миңнеханов башлангычларын һәм программаларын тормышка ашыручы, халыкны бердәмлеккә өндәүче, бер йодрыкка туплаучы «Президентыбыз белән бергә» дип исемләнгән республика иҗтимагый хәрәкәте тарафыннан башкарылды. «Язгы шәфкатьлелек атналыгы»да әлеге иҗтимагый хәрәкәтнең эш формаларының берсе.
Әлеге игелекле гамәлләр халыкның гражданлык активлыгын арттыру, социаль проблемаларны чишүдә идея-башлангычларга этәрү, бердәмлеккә өндәү максатыннан үткәрелде.
Әлеге акциянең гүзәл бер чагылышы буларак, 24 апрель көнне тирә-юньне чистарту, тазарту һәм агач утырту өмәләре узды. Бу көнне оешма-предприятиеләре хезмәт-кәрләре үз биләмәләрен чүп-чардан арындырсалар, алардан билгеләнгән вәкилләр Теләче авылының Магистральная урамына, Теләче урта мәктәбе коллективы, район социаль яклау идарәсе, халыкка социаль ярдәм күрсәтү үзәге хезмәткәрләре үз биләмәләренә агач утыртты.
"Язгы шәфкатьлелек атналыгы" акциясенең барышы турында сөйләвен үтенеп без, берничә сорау белән район башлыгы аппараты җитәкчесе, «Президентыбыз белән бергә» республика иҗтимагый хәрәкәтенең райондагы кураторы Илдар Мөбиновка мөрәҗәгать иттек.
- Атналык рәсми рәвештә нибары бер атна гына үтә.Аның кысаларына гына сыешып бетү мөмкин түгел. Беренчедән, олугъ бәйрәм - Бөек Җиңүнең 70 еллыгы якынлаша, икенчедән, Туган Җиребезгә Яз килде. Шушы ике вакыйга гына да безгә зур бурычлар йөкли. Мин моны куанычлы мәшәкатьләр генә дим. Шунысы сөенечле, "Язгы шәфкатьлелк атналыгы" акциясенә бер генә җирлек тә, бер генә мәктәп тә, бер генә мәдәният учагы да битараф калмады. Мәсәлән, атналык кысаларында Алан авыл җирлегендә яшәүчеләр матди ярдәмгә мохтаҗ балаларга кием-салым, уку кирәк-яраклары, кием-салым җыйсалар, Олы Нырсы урта мәктәбе укучылары Бөек Ватан сугышы һәм хезмәт ветераны Гарифулла Гобәйдуллин белән очрашып, аңа үзләре ясаган истәлек бүләге тапшырдылар. Айдар авылы балалары исә сугыш һәм хезмәт ветераны Нәбиулла Фәтхуллинның өендә булып, "Батырлык дәресе" үткәрделәр. Бу көннәрдә Максабаш, Урта Мишә, Югары Мәтәскә авылы клублары, Үзәк мәдәният йорты хезмәткәрләре учреждение биләмәләрен чүп-чардан арындырдылар. Олы Нырсы авыл җирлеге, мәдәният хезмәткәрләре 23 апрельдә агач утырту өмәсенә чыкты. "Җиңү урманы" дип исемләнгән акция барышында 28 төп агач утыртылды. Баландыш авылы китапханәчесе Миләүшә Нәҗипова тарафыннан балалар белән берлектә үткәрелгән "Беркайчан да онытмабыз" кичәсе дә зур мәгънәгә ия һәм игътибарга лаек. Әлеге кичәгә тыл ветераннары чакырулы булган. Мәгълүм атналык кысаларында Төрек-Тәмте авылында яшәүче Бөек-Ватан сугышы һәм хезмәт ветераны Нургали Шакирҗановның өендә,
(Ахыры 2нче биттә).
(Ахыры. Башы 1нче биттә).
ихатасында җыештыру эшләре башкарылды. Халыкка социаль ярдәм күрсәтү үзәге хезмәткәрләре өмә үткәреп кенә калмыйча, аны туган көне белән дә котлады. Ирекле "Волонтерлар" үзәге яшьләре Теләче ял паркында урнашкан мемориалны чистарту, тәртипкә китерү эшләре башкарылды. Иске Җөри авылында яшәүче күп балалы Гыйльметдиновлар гаиләсенә республикабыз Президенты Рөстәм Миңнеханов бүләге "Форд-Транзит" автомобиле тапшыру, Теләчедә ветераннар йорты ачу тантаналары "Язгы шәфкатьлелек атналыгы"ның соңгы аккорды булгандыр.
- Әлбәттә, бер әңгәмәдә генә башкарылган һәм башкарылачак эшләрне санап, барлап чыгу мөмкин түгел...
- Дәвамлы булсын иде алар. Игелек кылырга беркайчан да соң түгел. Игелекле гамәлләр атналык өчен генә башкарылмасын, ул безнең яшәү рәвешебезгә әверелсен иде.
Фәнил Нигъмәтҗанов

Нравится
Поделиться:
Реклама
Комментарии (0)
Осталось символов: