Теләче Информ

Балаларга бердәмлек турында

Теләченең беренче номерлы "Аленушка" балалар бакчасында Халыклар бердәмлеге көне уңаенан балалар, әти-әниләр һәм бакчада хезмәт куючы тәрбиячеләр катнашында күңелле чара булып узды.

Мондый бәйрәм берничә ел рәттән үтә. Шуңа да елдан-ел үз осталыкларын күрсәтүче балалар саны да арта. Бу юлы да өлкән һәм мәктәпкәчә әзерлек төркемнәренә йөрүче малай-кызлар, төрле милләт вәкилләре киемнәреннән киенеп, матур биюләр һәм җырлар, шигырьләр әзерләгән иде. Бәйрәм үткән залны сабыйларның бердәмлеккә, дус-тату булып яшәүгә өндәп ясалган рәсемнәре бизәде.
- Безнең районда татарлар, руслар, керәшеннәр, әрмәннәр үзара дус-тату яши. Бу чараның максаты да балалар арасында дустанә мөнәсәбәт булдыру, төрле милләт вәкилләренең гореф-гадәтләрен чагылдырган рәсемнәр, кул эшләнмәләре аша аларны таныту, - ди бакча мөдире Алисә Дәүләтшина.
Бәйрәм азагында катнашкан барлык балаларга да Мактау грамоталары һәм истәлек бүләкләре тапшырылды. Россия гимны белән башланган чара, Татарстан гимны сүзләренә кушылып җырлау белән тәмамланды.
Лилия Кыямова.

Нравится
Поделиться:
Реклама
Комментарии (0)
Осталось символов: