Хабаровск краенда һәлакәткә очраган самолетта сигез кешенең гомере өзелгән

Хабаровск краенда Let L-410 самолеты һәлакәткә очраган. Башлангыч мәгълүматлар буенча, очкычта 9 кеше булган, дип хәбәр итә "Новости" Россия мәгълүмат агентлыгы.

Хабаровск - Николаевск-на-Амуре - Нелькан рейсы «Хабаровские авиалинии» авиакомпаниясенә карый. Самолет Нелькан торак пункты янындагы күтәрелеш полосасы янында көчле басым белән төшеп утырган.

Һәлакәт шаһите булучыларның әйтүенчә, очкыч, төшүгә якынлашу вакытында, бер ягына янтая башлаган.

Башлангыч мәгълүматлар буенча, бер бала исән калган. Ул Нелькан районы үзәк хастаханәсенә китерелгән. Баланың хәле авыр, дип бәяләнә.
Башка 8 кеше һәлак булган.

Һәлакәт урынында Гадәттән тыш хәлләр министрлыгы һәм медицина хезмәткәрләре эшли. Самолетка ут капмаган.
Фаҗиганең килеп чыгу сәбәпләре ачыклана. "Хәрәкәт вакытында һәм һава судносын эксплуатацияләүдә саксызлык аркасында ике һәм аннан күбрәк кешенең үлеменә китергән куркынычсызлык техникасын сакламау" матдәсе буенча җинаять эше кузгатылган.

Татар Информ