Кайбер һөнәрне аңлап бетермиләр
Югары уку йортларында гаризалар саны сәгатьләп түгел, минутлап үзгәреп тора. Быелгы абитуриентларның укырга керү мөмкинлеге ни дәрәҗәдә? Вузларга шалтыратып, шуны белештек. Быел ил мәктәпләрен 640 мең укучы тәмамласа, вузларда бакалавриат, специалитет юнәлешендә 369 мең бюджет урыны бар. Республика югары уку йортларында исә 18 мең 531 абитуриент бушлай укый алачак.
Казан дәүләт ветеринария медицинасы академиясенең җаваплы сәркатибе Рубин Каюмов әйтүенчә, вузда бюджет урыннары шул килеш сакланган. Көндезге һәм читтән торып уку бүлегендә 320 урын бар. Хәзерге вакытта меңгә якын егет һәм кыз гариза тапшырган. “Абитуриентларның күбесе мал табибы булырга омтыла. Бигрәк тә шәһәр, район үзәкләрендә әлеге белгечләргә ихтыяҗ көннән-көн арта бара. Казандагы кайбер урамнарда хәзер хәтта 2-3әр лаборатория бар. Хезмәт хаклары да яхшы. Татар халкында әти-әни киңәшенә колак салу дигән нәрсә бар. Абитуриентларның күбесе аларның фикере белән исәпләшә, – ди Рубин әфәнде. – Әмма, кызганыч, зоотехник һөнәренең асылын бик аңлап бетермиләр әле. Авыл таркала бара, кирәге чыкмас дип, башка һөнәр сайларга тырышалар. Шуңа күрә зоотехник исемен үзгәртергә кирәктер дип уйлыйм. Әйтик, белгечлекне җитештерү буенча технолог яки менеджер дип атарга мөмкин. Безгә килүче абитуриентларның яртысы – чит төбәкләрдән. Анда уку йортының дипломы югары бәяләнә, диләр. Академиядә укыр өчен барлык мөмкинлекләр дә бар. Керү балларын арттырырга уйламыйбыз”.
КФУ, иң сәләтле яшьләрне җәлеп итү өчен, яңа төр стипендия уйлап тапкан. Олимпиадаларда җиңүчеләргә, БДИда йөз балл туплаучыларга 100 мең сумга кадәр акча түләргә җыена. “Акыллыбаш”лар дигәндә, билгеле булганча, КФУга 13 яшьлек Лина Мөхәммәтҗанова да документ тапшырган. Ул Казанның 122 нче гимназиясендә укып, соңгы елда читтән торып, Санкт-Петербургтагы мәгариф үзәген тәмамлаган. КФУ тарихында бу – икенче очрак.
Нурлат районының Колбай-Мораса авылында яшәүче Мария Матвеева документларын КФУның татар теле юнәлешенә биргән. Урыс милләтеннән булган кыз турында күптән түгел газетабызда да язып чыккан идек. “КФУда бер урынга 5-10 кеше дәгъва кыла. Өстәмә төрек яки инглиз теле укытучысы белгечлеген дә алырга мөмкин. Бәйге зур булгач, документларымны, аптырап, Казан инновацияләр университетына да тапшырдым. Татар теле укытучысы булу теләгем акланмаса, дәүләт хезмәткәре яки юристлыкка түләп укырга туры киләчәк”, – ди Маша.
Фото: http://www.vatantat.ru
http://www.vatantat.ru
Следите за самым важным и интересным в Telegram-каналеТатмедиа
Нет комментариев