Р.Миңнеханов Дөнья чемпионатын үткәрүдә теләктәшлек өчен В.Путинга рәхмәт әйтте

Татарстан Президенты Рөстәм Миңнеханов Россия лидерына футбол буенча Дөнья чемпионатын үткәрүче шәһәр буларак Казанга ышаныч белдергәне өчен рәхмәт әйтте.

“Хөрмәтле Владимир Владимирович, шәхсән сезгә, Россия Хөкүмәтенә Казанда футбол буенча Дөнья чемпионаты матчларын оештыруда һәм үткәрүдә ышаныч һәм теләктәшлек белдергәнегез өчен рәхмәт”, - дип мөрәҗәгать итте Миңнеханов Путинга.

Татарстан Президенты хәбәр иткәнчә, Казан алты уен кабул итте, “Казан-Арена” стадионында матчларны 255 мең тамашачы карады. 800 меңнән артык кеше Җанатарлар фестивалендә катнашты. Дөнья чемпионаты көннәрендә Татарстанга 300 мең чамасы турист килеп, шуларның 60 проценты - чит ил кешеләре иде.

• Владимир Путин Калининградта Физик культура һәм спортны үстерү советы белән “Россия-2018” оештыру комитеты” Коммерцияле булмаган автоном оешма күзәтчелек советының уртак утырышын үткәрә. Бу очрашуда 2018 елгы Дөнья чемпионатына нәтиҗә ясыйлар.

Фото: архив/Ильнар Тухбатов

https://tatar-inform.tatar