Теләче Информ

«Ирем өйдә квартирант кына!»

Кәчимир авылында яшәүче Степановларның итәк тулы – бала, абзар тулы – мал, бакча тулы – җиләк-җимеш, яшелчә. Башкалардан аерылып торган яклары да юк кебек инде…

Рәйхана апа Степанова – шушы гаиләне туплап, өй җылысын саклап торучы, Радик абыйның яраткан хатыны, өч баланың кадерле әнисе. Гаилә тарихын аннан сорашабыз. Ә хатын-кыз сөйләшергә-серләшергә ярата бит инде ул! 24 августта Степановлар гаиләсенә 24 «яшь» тулган икән. Шул 24 елга бәхетле-мәхәббәтле дә, сынаулы да чаклар сыйган.

Рәйхана апа белән Радик абыйның тәүге сабыйлары җитлекмичә, алты айлык булып туа. Табибларның: «Өметле бала булмас, ташлагыз!» – дигән сүзләрен дә ишетәләр. Ишетәләр, әмма чынга алмыйлар! Улларының ишетү сәләте юк. Аның сөйләшүен дә якыннарына гына аңлау бирелгән. Моңа да карамастан, Руслан – спортчы. Төрле ярышларда җиңеп, әти-әнисен сөендереп кенә тора. Кемнән ким соң әле ул? Русланнан кала тагын ике балалары – Артур белән Ильвира бар. Тиктормас ата-аналары кебек, алар да барысын да булдыра торганнардан.

– Олы улым  бөтен йортны карап тора, уң кулыбыз ул өйдә. Аннан башка мин – нуль! Дөрес, балаларны беркайчан да авыру һәм сәламәт булуларына карап бүлмәдек, барысын да тигез карадык. Ирем өйдә квартирант кына! Ялга кайта да тагын китә. 21 еллап инде командировкаларга китеп эшли ул, – ди Рәйхана апа. Зарланмый, юк! «Квартиранттан файда бар ич: күп итеп акча алып кайта, безне ярата!» – дип шаяртып  ала.

Эше дә балалар белән бәйле әңгәмәдәшемнең. Рәйхана апа «Кыңгырау» балалар бакчасында тәрбияче булып эшли. «29 ел шушы хезмәттә мин. Үз эшемне яратам. Балаларга татар телен өйрәтәм», – дип сөйләде ул.

Реклама

Рәйхана апаның вакыты гаиләсенә дә, җәмәгать эшенә дә кала. 2017 елда «Нечкәбил» бәйгесендә «Игелекле Нечкәбил» номинациясендә җиңүче булып таныла.

Руслан, Артур һәм Ильвира телефон тотып түгел, эш рәтен белеп үсәргә тиеш. Степановлар шуңа күрә дә өй тулы мал асрый.

-7 ел атлар асрыйбыз. Быел бер атны колынлатырга уйладык. Кечкенәдән үк кулга ияләштереп, болыннарда уйнатып үстерергә хыялланабыз. Ике атыбыз бар хәзер. Иткә дип үстерәбез берсен, – дип тезеп китте Рәйхана апа. – Хыялланырга яратам инде, сизгәнсеңдер… Бытбылдык ите файдалы дигәч, анысын да сатып алдык. Алар шырпы кабының яртысы кадәр генә инде! Сөбханалла, тиз үсеп киттеләр! 10 ана, 8 ата бытбылдыгыбыз бар. Көн саен 10ар йомырка җыеп алам. Үрдәк-каз да асрыйбыз. Күркәләр дә бар иде әле. Иң зурысы 7 килога җитте! Олы улым: «Әни, сыер алабызмы?» – дигәч, танабызны сыер итәргә булдык. Үгез асрыйбыз. Авылда яшәгәч, мал-туар янында кайнашып яшәргә кирәк, дим. Бакчамда – сары кура җиләге, зелпе, бөрлегән. Быел балалар белән урманнан каен җиләге алып кайтып утырткан идек. Көзен чәчәк атып маташалар! Шуңа куануымны белсәң!..

Чулпан Гарифуллина

https://vatantat.ru

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: