Язмалар
Татарстанда 76 яшьлек пенсионер мохтаҗларга ярдәм итү өчен эшләп йөри
Яхшылык эшлә дә суга сал, халык белмәсә, балык белер. Халыкта әнә шундый мәкаль бар. Күпләр изге гамәлен күрсәтми эшләсә дә, кайвакыт бу хакта башкаларга җиткерүнең дә гөнаһы юк. Мактану яки макталу түгел, тормышның асылын аңламыйча, булганына шөкер итмәүчеләргә гыйбрәт булсын өчен.
Газетабызда ярдәм сораган язмалар күп чыга. Мохтаҗлар да күп очрый юлыбызда, аларга ярдәм итәргә теләүчеләр дә. Кайбер сабыйлар турында әле язганда ук, бу балага Нурфаяз абый, ул булмаса, Таһир абый булышмыйча калмас, дигән уй килә. Күңел алдамый, озак та үтми, телефонга бу абыйларның берсеннән булса да смс килеп төшә: “Узган атнада ярдәм сораган балага акча җибәргән идем. Барып җиттеме икән?” Берсе – сиксәннең теге ягында, икенчесе дә аннан калышмый. Алар акчаны безнең кебек интернет аша гына күчерми, район үзәгенә барып, банк аша эш йөртә.
Таһир абый Галиуллин белән моннан бер ел элек таныштык. Пенсиясен мохтаҗларга тотар өчен, бу абый әле дә эшләп йөри икән. “Миңа – 76 яшь. Сәламәтлегемнән зарланмыйм. Тапкан акчамны гаиләмә тотам, пенсиямнән ятимнәргә, авыруларга өлеш чыгарам. Үзем яши торган Биектау районының Күлле авылындагы авыр хәлдәге кешеләргә дә булышам. Бу гамәлләремне Аллаһы Тәгаләнең ризалыгы өчен башкарам, – дип сөйли Таһир абый. – Сезнең газетаны яратып алдырам. Авыр хәлдәге кешеләр турында язган мәкаләләрне кат-кат укып чыгам. Үземне әллә ни бай дип әйтә алмыйм. Әллә ни күп акчам юк. Әмма ай саен кемгә булса да акча җибәрмичә калмыйм. Безнең бит тормышыбыз шөкер итәрлек. Ашарга бар, авыл җирендә ризыксыз тормыйбыз. Кемнедер сөендерә алсам, күңелгә рәхәт”.
Таһир абый – Әлки районының Иске Чаллы авылыннан. Язмыш кушуы буенча, Биектау районында төпләнеп калырга насыйп була. “Туган як әле дә сагындыра, – ди ул. – Авылымны да онытмыйм. Мәчет төзелгәндә, бераз булса да сәдака бирә алдым”.
Таһир абый газетабызның 100 еллыгы уңаеннан узган кичәгә дә килде. Билгеле булганча, әлеге чараны без хәйрия концерты итеп оештырдык һәм Биектау районындагы Дөбьяз авылы егете Илнар Хәлиуллинга ярдәм итәргә тырыштык. “Мин концертка махсус килдем. Редакция журналистларын күрәсем килде. Хәйрия чаралары ничек уза икән дигән кызыксынуым да бар иде. Шаккатып, сөенеп кайттым. Алып килгән акчамны Илнарның әтисенә тапшырдым. Кичке якта, Илнар үзе шалтыратып, рәхмәт әйтте. Шул сүз бар дөньямны яктыртты. Күңелгә рәхәт бер хис тулды. Шул егеткә бераз булса да булыша алганыма сөендем, – ди Таһир абый. – Аллаһы Тәгалә кабул итеп алсын. Бүгенге көн белән генә түгел бит әле, бакыйлыкка күчәсе бар. Әнә шунда барганда букчам буш булмасын дим”.
Сүз уңаеннан, Илнар Хәлиуллинга хыялын тормышка ашырыр өчен 9 миллион сум акча кирәк иде. Бу кадәр сумманы ничек җыеп бетерербез, дип баш ватканда, башка клиника белән элемтәгә кергәннәр. Болары 4,5 миллион сум акча сорый икән. Алар егетне 18 июньдә үзләрендә көтә. Шөкер, җитмәгән сумманы мәрхәмәтле кешеләр ярдәме белән җыеп, Илнар юлга чыгарга әзерләнә. Без аның савыгуын, күңеле көткәннән дә ныграк сәламәтләнеп кайтуын телибез.
Следите за самым важным и интересным в Telegram-каналеТатмедиа
К сожалению, реакцию можно поставить не более одного раза :(
Мы работаем над улучшением нашего сервиса
Нет комментариев