Татарстан профсоюзлары федерациясе рәисе Татьяна Водопьяновага каршы җинаять эше кузгату тирәсендәге вакыйгалар гел үзгәреп тора. Башта "Бәкер" шифаханәсе аша озак еллар дәвамында акча үзләштереп ятуда шикләнелүче ханым тикшерүчеләргә биргән күрсәтмәсеннән баш тартты, үзенә басым ясауларын әйтте. Соңрак исә хокук саклаучылар интернетта киресен дәлилләүче видеоязма урнаштырды.
Татарстан буенча Эчке эшләр министрлыгының...
Татарстан профсоюзлары федерациясе рәисе Татьяна Водопьяновага каршы җинаять эше кузгату тирәсендәге вакыйгалар гел үзгәреп тора. Башта "Бәкер" шифаханәсе аша озак еллар дәвамында акча үзләштереп ятуда шикләнелүче ханым тикшерүчеләргә биргән күрсәтмәсеннән баш тартты, үзенә басым ясауларын әйтте. Соңрак исә хокук саклаучылар интернетта киресен дәлилләүче видеоязма урнаштырды.
Татарстан буенча Эчке эшләр министрлыгының матбугат хезмәте хәбәр итүенчә, 2015 елда Татьяна Водопьянова "Бәкер" шифаханәсе баш табибына оешма исеменнән үз тормышын бер елга иминиятләштерү турында килешү төзергә күрсәтмә биргән. Ачыклык та кертик: Татарстан профсоюзлары федерациясе шифаханәнең бердәндер оештыручысы булып санала. Хокук саклаучылар белдергәнчә, күрсәтмәне үтәмәгән очракта, Татьяна Водопьянова баш табибны эштән азат итү белән янаган. Татарстан буенча икътисади куркынычсызлык һәм коррупциягә каршы көрәш идарәсе хезмәткәрләре килешүнең ярты миллион сумга төзелгән булуын ачыклаган. Аның нигезендә, Татьяна Водопьянова өчен иминият кертемен шифаханә түләгән. Ә килешү вакыты төгәлләнгәч, документ нигезендә профсоюзлар оешмасы җитәкчесенә иминият очрагы итеп 430 мең сумнан артык күләмдә акча түләнгән. Әлеге схеманы берничә тапкыр кулланылган дип шикләнәләр. Татарстан Тикшерү комитеты җинаять эше кузгаткан. Рәсми мәгълүматларга караганда, сорау алу барышында Татьяна Водопьянова гаебен таныган һәм хокук саклау органнары белән хезмәттәшлек итәргә әзер булуын белдергән.
Әмма соңрак рәис үзе бу сүзләрне кире какты. "Татар-Информ" мәгълүмат агентлыгына биргән аңлатмасында ул канун бозарлык бернинди дә гамәл кылмавын әйткән. Аның сүзләренә караганда, профсоюз вәкилләре "Бәкер" шифаханәсенең элеккеге җитәкчелеген акча урлауда фаш иткән булган. Хәзер шул җитәкчелек Тикшерү комитетына мөрәҗәгать иткән дә инде. Ә "гаепне тану"га килгәндә, тикшерүчеләр психологик басым ясады, дип белдергән Татьяна Водопьянова. "Кичә мине Россия Тикшерү комитетының Татарстан буенча Тикшерү идарәсенә әңгәмәгә чакырдылар. Алты сәгать дәвамында миңа көчле басым ясалды, адвокат чакыру мөмкинлегеннән мәхрүм иттеләр. Камерага ябу белән янаганнан соң, мин биргән күрсәтмәләр гаепне тану итеп бәяләнде. Үземдә бернинди гаеп тә сизмим, адвокат белән киңәшкәннән соң, прокуратурага мөрәҗәгать итү мәсьәләсе хәл ителәчәк", - дигән ул.
Интернетта моның киресен дәлилләүче видеоязма пәйда булды. Аннан күренгәнчә, сорау алу барышында Татьяна Водопьянова адвокаты янәшәсендә 2009 елдан алып 2015 елга кадәр "Бәкер" шифаханәсе төзегән килешү нигезендә ел саен 500 мең сумга якын акча үзләштереп баруын раслый. Әлеге акчаны үз кирәк-яракларына тотуын әйтә. Тикшерү эше дәвам итә.
Эльвира Вәлиева
Матбугат.ру
Нет комментариев