Теләче Информ

Тегүче Мәгъфүрә

Күпне күргән, күпне кичергән өлкәннәр белән күрешеп сөйләшкәч, җаным сафланып, күңелем баеп кала. Узган атнада Шәтке авылында яшәүче, үзенең 90 яшьлеген тутырган Мәгъфүрә Закирҗан Нургалиева һәм аның балалары белән күрешеп кайткач та шулай булды. Алардан алган яктылык, аклык һәм пакълек әле дә булса күңелне рухландырып, сафландырып тора. Минемчә, бу гаиләдән,...

Күпне күргән, күпне кичергән өлкәннәр белән күрешеп сөйләшкәч, җаным сафланып, күңелем баеп кала. Узган атнада Шәтке авылында яшәүче, үзенең 90 яшьлеген тутырган Мәгъфүрә Закирҗан Нургалиева һәм аның балалары белән күрешеп кайткач та шулай булды. Алардан алган яктылык, аклык һәм пакълек әле дә булса күңелне рухландырып, сафландырып тора. Минемчә, бу гаиләдән, әти-әни тәрбиясеннән килә. Мәгъфүрә әби һәм аның балалары, оныклары белән аралашу үзе бер рәхәт. Алар янәшәсендә күңел ял итә. Мәгъфүрә әби балалары күңелендә эчкерсезлек, ярдәмчеллек, эш сөючәнлек һәм шул ук вакытта гадилек кебек күркәм сыйфатлар тәрбияли алган. Бүген ул шуның татлы җимешен ашый: улы Әхмәтвәли белән килене Миннегөл тәрбиясендә мул, бәхетле тормышта яши. Килене Миннегөл дә каенана туфрагыннан, икесе бик килешеп яшиләр. - Киленебез Миннегөл кечене - кече, олыны-олы итә белә, уңган-булган хатын. Нәрсәгә генә тоынса да, булдыра. Кем кайтса да, кайчан кайтса да якты йөзе, тәмле теле белән каршы ала, беребезне дә аермый. Безне дә, үз туганнарын да бердәй кабул итеп ала, кунак итә. Әниебезне дә оҗмахта яшәтә. Аллаһы Тәгаләнең рәхмәте яусын аңа! - дип белдерде Мәгъфүрә әбинең Сабада яшәүче олы кызы Вәсимә апа.

Балачагында, яшьлегендә михнәтләрне аз татымый Мәгъфүрә әби. Чордашлары белән бергә Апас, Кайбыч якларына китеп урманын да кисә, окобын да казый. Сугыш чоры яшьләрне авыр хезмәт белән генә түгел, ачлык, ялангачлык белән дә сыный. Өстәвенә, фронттан бер-бер артлы кайгылы хәбәрләр килеп тора. Авырлыклар, кайгы-хәсрәт ишелеп килсә дә, сынмый, сыгылмый авыл халкы. Бергә, бердәм булып күтәрә сугыш чоры авырлыкларын. Мәгъфүрә әбигә кулы эш белүе - тегүче булуы җиңеләйтә әлеге авыр елларны. Әлеге шөгыле балалар үстергәндә дә зур ярдәм итә. Әйе, алар сугыш ветераны Гали ага белән 1946 елда өйләнешеп, биш кыз, бер ул тәрбияләп үстерәләр. Мәгъфүрә әби ул чакта төп йортка җиденче кеше булып килә. - Шулай булса да, сыйдык, ул вакытта өйләр тар булса да, күңелләр иркен иде. Үзем һич кенә дә туксан яшькә җитәрмен дип уйламадым. Нишлисең, Аллаһы Тәгалә биргән гомерне яшәмичә булмый. Урыным түрдә. Балаларым, оныкларым, оныкчыкларым кайтып хәлемне белеп торалар, - ди ул тыйнак кына итеп. Сөбханалла! Күз генә тимәсен! Мәгъфүрә әби, мин туксан яшьтә дип тормый, яз көне каз бәбкәсе дә саклый, әбиләргә матур-матур күлмәкләр дә тегеп кидертә икән. Бүген аның унбиш оныгы, унҗиде оныкчыгы бар. Балалары - Вәсимә - Сабада, Наиләсе мәрхүмә, Нәкыя - Чаллыда, Сөембикә - Шәткедә, Вәсилә - Сабада, Әхмәтвәли төп йортта - Шәткедә яши. Кызганыч, әтиләре Гали ага гына кыска гомерле була, ул 1984 елда дөнья куя. Мәгъфүрә әби "Большевик" колхозында "бригад эше"ндә хезмәт куеп лаеклы ялга чыга. Гали ага да шул ук хуҗалыкта җаваплы вазифалар башкара.
Узган атнада юбилярны гомер бәйрәме белән район хакимияте аппараты җитәкчесе Илдар Мөбинов белән Шәтке авыл җирлеге башлыгы Фәрит Кадыйров котлады. Балалары, оныклары катнашында узган тантанада Мәгъфүрә әбигә Россия Федерациясе Президенты Владимир Путинның Тәбрикләү хаты, чәчәкләр һәм истәлек бүләге тапшырылды.
Фәнил Гаязов.

Реклама

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: