Күптән түгел Дәүләт Думасында спайслар әйләнеше өчен җинаять җаваплылыгы, ә аны кулланган өчен административ җаваплылык турында закон кабул ителде.
Соңгы вакытта наркотикның яңа төре - спайсны кулланучылар арту җитәкчелекне дә борчуга салды. Яман уйлы кеше, юлын җир астыннан да яра дигәндәй, наркотикларның да соңгы вакытта Интернет, социаль челтәрләр аша тарату ысулы киң җәелгән. Шулай ук Интернет челтәрендә наркотикларны үзең ясау ысулларын тәкъдим итүче сайтлар да бар, аларны да юк итү өстендә актив эш алып барыла.
Теләче районы прокуратурасы да бу нисбәттән «Наркотик һәм психотроп матдәләр» турындагы федераль канун таләпләре үтәлешен тикшерү буенча эш алып бара. Чираттагы тикшерү барышында РФ Хөкүмәтенең 681нче номерлы карары (30.06.1998 ел) нигезендә Россия территориясендә әйләнештә тыел-ган наркотик матдә-ләрне пропагандалау-чы бер Интернет сайтта наркотик матдә ясау ысулы турында мәгълүмат булуы ачыклана. Әлеге сайтка һәм форумга керү ирекле, теркәлү үтү дә, пароль да таләп ителми, һәр теләгән Интернет кулланучы бу сайттан теләгән мәгълүматны укый, электрон вариантта үзенә күчерә ала. Мәгълүматның күчермәсен алу һәм тарату турында тыю күрсәтелмәгән. РФнең «Наркотик һәм психотроп матдәләр турында»гы федераль кануны ниге-зендә әлеге сайтта урын алган наркотик ясау турындагы мәгълүматның халык хозурына урнаштырылуы - закон тарафыннан тыелган гамәл.
«Район прокуратурасы, тикшерү нәтиҗәләре буенча, әлеге Интернет битендәге мәгълү-матны, Россия территориясендә таратылырга тыелган мәгълүмат итеп тану турында район судына гариза юллады. Шулай ук Бердәм реестрга закон тарафыннан тыелган мәгълүматларны таратучы сайт турында мәгълүматны кертү өчен, әлеге сайт битенең Интернет адресы күрсәтелгән суд карарын, домен исемнәренең Бердәм реестр операторына җибәрү тәкъдим ителде. Район прокуратурасы тарафыннан гаризада күрсәтелгән таләпләрне район суды тулаем канәгатьләндерде», - дип хәбәр итте район прокуроры ярдәмчесе Илнур Мөхәммәтҗанов.
Наркотик - замана афәте, аның белән көрәшү максатыннан оештырылган һәр ысул да мактауга лаек. Мәсәлән, хәзерге вакытта Россия регионнарында баручы «Үлем белән кайда сату итәләр?» акциясе дә моңа ачык мисал. «16-27 март көннәрендә узучы әлеге акциянең максаты - наркотиклар белән бәйле проблемаларга җәмәгатьчелекнең игътибарын юнәлтү, наркотик бәйлелегенә эләккән кешеләргә ярдәм күрсәтү. Акция дәвамында ышаныч телефоннары тәүлек буе эшли, Татарстанның муниципаль берәмлекләре өчен дежур частьнең ышаныч телефоны номеры - 8(843)2-912-002, ә Татарстанның наркокотроль Идарәсе ышаныч телефоны - 273-43-45», - дип хәбәр итте безгә район полиция бүлегенең участок уполномоченныйлары һәм балигъ булмаганнар эшләре буенча бүлек җитәкчесе Марат Сагитов.
Кызганыч, сәбәпчесе наркотик булган трагедияләр саны көннән-көн арта, иң аянычы - бу афәткә яшьләр иярүе. Әгәр наркотиклар әйләнеше турында мәгълүмат белгән һәр кеше, ышаныч телефонына шалтратып, бу хәбәрне җиткерсә, наркотиклар белән көрәшү бермә-бер җиңеләер иде.
Рәфилә Шәмсетдинова
