Менделеевск районында исерек машина йөртүче аркасында кеше гомере өзелгән

Менделеевск районында аек булмаган машина йөртүче идарәне югалтып, йөк машинасына килеп бәрелгән. Һәлакәт аркасында 28 яшьлек пассажирның гомере өзелгән. Бу хакта "Татар-информ" агентлыгына Россия Гадәттән тыш хәлләр министрлыгының Татарстан буенча Баш идарәсе матбугат хезмәтеннән хәбәр иттеләр.

Бүген иртән Алабуга - Ижевск юлының 12 нче чакрымында, Мунайка авылы тирәсендә, "Лифан" автомобиленең аек булмаган йөртүчесе идарәне югалтып, "Айвеко" йөк машинасына килеп бәрелгән. Юл-транспорт һәлакәте арасында, җиңел машинаның 28 яшьлек пассажиры урында ук үлгән, ә 24 яшьлек йөртүче тән җәрәхәтләр алган, әмма хастаханәгә барудан баш тарткан.