БӨТНЕК ТӘРӘЗӘ ТӨБЕНДӘ ҮСӘ

Бөтнек талымсыз, гөл кебек, тәрәзә төбендә дә үсә ала. Аны көзен бакчадан күчереп, чүлмәккә утыртырга да мөмкин. Бакчачылык кибетләрендә бөтнекнең орлыкларын да таба аласыз.

Ул торфлы туфракта яхшы үсә. Орлыкларны тирән чәчмиләр, бөтнек шактый озак — 2-3 атна тишелә. Үсентеләргә 20-25 оС җылылык һәм яктылык кирәк. Яктылык җитмәгәндә, үсемлек ямьсезләнеп, өскә тартыла һәм егыла башлый. Бу очракта температураны 15-17 оСка кадәр төшерү зарур.

Суны күп сипмәгез, югыйсә ул чирләргә бирешә башлый. Бөтнек үтәли җилне яратмый. Шуңа аны өйнең түренәрәк, тәрәзә төбенә куялар. Язга таба үсемлекне туры кояш нурларыннан сакларга кирәк булачак.

vk.com/irekmaydani