ТР буенча Роспотребнадзор: Саф һавада коронавирус инфекциясе йоктыру куркынычы бик аз

Хәзер саф һавада яңа коронавирус инфекциясе йоктыру куркынычы бик түбән. Бу хакта республикада оештырылган туры эфирда Роспотребнадзорның ТР буенча идарәсе җитәкчесе урынбасары Любовь Авдонина сөйләде.

«Хәзер республикада урнашкан температура белән саф һавада яңа коронавирус инфекциясе йоктыру куркынычы бик аз», - дип билгеләп үтте ул.

ТР Баш санитар табибы урынбасары май бәйрәмнәре вакытында урамда һәм дачаларда күбрәк вакыт үткәрергә киңәш итте. Аның сүзләренә караганда, республикада температура 25 градустан югарырак булганда пляжлар шулай ук куркынычсыз булачак, чөнки бу температура вирус таралу өчен уңайлы түгел.

Любовь Авдонина коронавирус белән зарарлану өчен иң куркыныч урыннар — кешеләр күпләп җыелган ябык бүлмәләр, анда инфекциядән саклану чараларын үтәмиләр, дип билгеләп үтте.

Чыганак