ТР Икътисад министрлыгы сәнәгать парклары резидентларыннан ярдәм итүгә гаризалар кабул итә башлый

Татарстан Республикасы Икътисад министрлыгы 5 июльдән сәнәгать парклары резидентларыннан һәм идарәче компанияләреннән 70% тан да түбәнрәк йөкләнеш белән сәнәгать паркларын үстерүгә юнәлдерелгән чаралар комплексына гаризалар кабул итә башлый. Әлеге чаралар инфраструктура мәйданчыкларының нәтиҗәлелеген арттыру һәм эшлекле активлык югарырак булган авыл җирендә һәм эре шәһәрләрдә урнашкан парклар арасында конкурентлы мөмкинлекләрне тигезләү максатларында эшләнде.

Исегезгә төшерәбез, хәзерге вакытта Татарстанда 105 сәнәгать паркы бар, алар территориясендә 1528 компания-резидент эшчәнлек алып бара, алар тарафыннан 38 меңнән артык эш урыны булдырылган. Сүз дә юк, сәнәгать парклары муниципаль берәмлекләр икътисадын үстерүгә зур өлеш кертә, эш урыннарын формалаштыру һәм модернизацияләү буенча нәтиҗәле механизм булып тора.

Аларны комплекслы тигез үстерү өчен Икътисад министрлыгы тарафыннан Татарстан Республикасы Президенты Р.Н.Миңнеханов тарафыннан яңа концепция эшләнде һәм расланды. Концепцияне гамәлгә ашыру кысаларында элек кече һәм урта эшкуарлык субъектларына 10 елга кадәр түбәндәге салым ташламаларыннан файдаланырга мөмкинлек бирә торган закон инициативалары кабул ителгән иде:

- УСН буенча түбәнәйтелгән ставкалар «Керемнәр»-1%, «Керемнәр – чыгымнар»-5%;

- транспорт салымын һәм оешмалар милкенә салым түләүдән тулысынча азат итү.

Моннан тыш, Концепция нигезендә, сәнәгать паркларының резидентлары һәм идарәче компанияләре үз эченә алган ярдәм чараларының пакетлы комплексына исәп тота алалар:

- кредитлар буенча процент ставкасын субсидияләү;

- сәнәгать биналары, коммуналь һәм юл инфраструктурасы объектларын төзү, модернизацияләү һәм (яки) реконструкцияләүгә «Төзелеш» займын 5 елга кадәр  5% белән 30 млн. сумга кадәр бирү; 

- ташламалы шартларда микрозаймнар елына 4,5% белән;

- электр энергиясенә чыгымнар өлешен субсидияләү.

Әлеге ташламалардан файдалану өчен, эшкуарга индустриаль (сәнәгать) парк территориясендә эшчәнлек алып бару турында ТР Икътисад министрлыгы белән килешү төзергә кирәк. Шул ук вакытта сәнәгать паркы, Казан һәм Яр Чаллы шәһәрләреннән кала, республиканың бер муниципаль районында булырга тиеш. Сайлап алу критерие - паркның тулылануы-70% тан кимрәк, резидент Татарстан бюджетына салымнар түләргә һәм гариза биргән көнгә КУЭ субъекты булырга тиеш, ә парк үзе - ТР Икътисад министрлыгының Тиешле аккредитациясе булырга тиеш.

Килешү төзү өчен гаризалар Татарстан Республикасы Икътисад министрлыгына караган Эшкуарлыкка ярдәм итү Фонды тарафыннан Казан шәһәре, Петербург ур., 28 йорт адресы буенча кабул ителә. Шулай ук башлангыч консультацияне 8 (843) 524-90-90 телефоны буенча алырга мөмкин.