“Туган җирем – Теләче” сәнгать фестивален Алан авыл җирлеге үзешчәннәре башлап җибәрде

Районыбызның яңадан торгызылуына 25 ел тулу уңаеннан игълан ителгән "Туган җирем - Теләче" сәнгать фестивален Алан авыл җирлеге үзешчәннәре башлап җибәрде. 5 февраль көнне район мәдәният йортында узган концерт кәефне күтәрә торган позитив чара булып истә калды. Фестиваль кысаларындагы тәүге концерт булса да, аны һич кенә дә төерле булды диясе килми. Киресенчә ачык төсләргә бай концерт иде ул.

Концертның пролог өлеше сөенечләрдән генә торды дисәң дә була. Йомырка тәгәрәтү, теләкләр әйтү, сабанга әзерләнү фольклор күренешләре Галиҗәнәп-Икмәккә мәдхия булып яңгырады. Шунысын да әйтеп үтәргә кирәк, узган ел бу төбәк халкы бөртеклеләрнең һәр гектарыннан мул уңыш җыеп алып, район хуҗалыклары арасында беренче урынга чыкты. Чыннан да, Алан җирлеге үзешчәннәренең Икмәк турында зурлап сөйләргә тулы хакы бар. Шуңа да алар Теләчебезнең олугъ юбилеена бүләк итеп тормышыбыз нигезе булган Икмәк пешереп алып килгәннәр. Бик тәэсирле мизгелләр иде бу.

Фольклор күренешләрдән соң сәхнә "Көмеш телле гармуным" ансамбленә бирелде. Әлеге ансамбльнең дә чыгышы зур алкышларга күмелде. Дөрес, ансамбль әгъзаларының күбесе өлкән буын кешеләре. Алар үз чорында тальян гармун белән яшьтәшләрен солдатка озатканнар, туй мәҗелесләрендә, кичке уеннарда кунакларның, яшьтәшләренең күңелләрен ачканнар. Аерым башкаручылардан Гөлсем Биккинина, Илнар Хәсәнов, Рәшит Гайнетдинов, Сиринә Исмәгыйлева, Әхмәт Хаҗиев, Габдулла Сөләйманов, Сәлимә Галиәхмәтова, Гүзәлия Кәримова, Дилүс Хәбибуллин, Миндияр Шәймәрданов, Илнар Рәшитов, Айнур Каюмовларның да чыгышлары тамашачыларның күңеленә хуш килде. Соңгы дүрт егетне Алан төбәгенең мактанычы, горурлыгы дияргә мөмкин. Көчле тавышлы, моңлы әлегедәй дүрт яшь җырчы егет бер җирлектә дә юк. Ә Алан урта мәктәбе укытучыларыннан торган хорны һәм халык уен кораллары оркестрын аланнарның яңа табышы дисәк һич ялгыш булмас. Илзирә Шәйхетдинова белән Әмир Антонов тарафыннан башкарылган парлы бию тамашачылар мәхәббәтен яулап алды.

Реклама

Әлбәттә, иң истә калганы "Ядкарь" фольклор ансамбле иҗат иткән "Аулак өй", "Умырзая" фольклор төркеме күрсәткән "Сөлге җыю" күренеше, гомуми көч белән эшләнгән "Кунаклар хөрмәтләү" музыкаль -хореографик композицияләре булды. Болары бер сулыш белән каралды. Тамашаларның артында клуб берләшмәләре җитәкчеләре Фәния Хәсәнова, Гөлүсә Әхмәтова һәм Рәйхана Антоноваларның һәм үзешчәннәрнең биниһая зур хезмәте ята.

- Фестивальдә беренче булып чыгыш ясау өстәмә авырлык һәм җаваплылык тудыра. Шуңа да карамастан, тырышкансыз, җиренә җиткереп бер дигән концерт программасы әзерләп алып килгәнсез. Беренче булып чыгыш ясап, беренче урынны алып кайтып китмәгәегез, - дип белдерде уенын-чынын бергә кушып, концерт азагында аланнарны иҗат уңышлары белән котлаган район мәдәният бүлеге җитәкчесе Даут Ихсанов.

Фәнил Нигъмәтҗанов.