Юдино бистәсендәге янгында ике кешенең гомере өзелгән

Янгын бүген - 20 ноябрь иртәсендә булган. Гадәттән тыш хәл турында янгын сүндерү хезмәтенең кизү бүлегенә 4:30 сәгатьтә хәбәр ителә.

Хәбәр кереп 2 минут узу белән коткаручылар янгын булган урынга килеп тә җитә. Ике катлы кирпеч йортта ике бүлмәле фатир януы ачыклана. Янгынны сүндергән вакытта ике кешенең үле гәүдәсе табыла. Алар - 1956 елгы хатын-кыз һәм ул минутка шәхесе ачыкланмаган ир-ат булып чыга. Фатида 5 квадрат метрга таралып өлгергән янгынны 4:57 сәгатьтә сүндерәләр.

Тикшерү бара.

intertat.ru