Борчылыр урын юк

Бу көннәрдә һәр кешенең телендә коронавирус. Хәтта балалар бакчасына йөрүче кызым да, битлек киясе, алайса вирус эләгә дип борчыла.

Кибет киштәләрендә ярмаларны күпләп алучыларны күрәбез, телефонның ватсап төркеменә дә күрше районда коронавирус табылган дигән хәвефле, ялган хәбәрләр килә. Теләчедә дә авыручылар бар дигән сүзләр дә килеп ирешкәч, әлеге мәсьәләгә ачыклык кертү максатыннан, район үзәк хастаханәсенең баш табибы Ирек Галиуллинга мөрәҗәгать иттек.

“19 март көненә булган мәгълүматлар буенча, районда бер кешедә дә коронавирус табылмады. Һәр нәрсә ныклы контрольдә, борчылырлык урын юк”, - диде ул.

Бүген район үзәк хастаханәсе гадәти режимда эшли. Әгәр дә, шикләнеп, коронавирустан тикшеренергә теләсәң, биредә анализ алу өчен бар мөмкинлекләр тудырылган. Пневмония белән авыручыларның да анализлары алынып, Казанга тикшерелүгә җибәрелгән. Табиблар кеше күп була торган урыннарда йөрмәскә киңәш итә.