Бозауны иясенә тапшырдык

- Район газетасын күптәннән алдырабыз, квитанцияне дә еш тапшыра килдек, әле сездән бүләк алган юк иде, менә бит  насыйп булгач, бозау кадәр бозау оттык, әле ышанмадык башта. Иганәче Рафик Мансуровичка, сезгә, "Теләче" газетасы хезмәткәрләренә бик зур рәхмәт, эшегездә уңышлар телим, - диде Фирания апа Фатхулловна.

Әйе, газетага язылучылар арасында бүләкләр уйнатуда, Югары Мәтәскә авылында  2000 елда үз хуҗалыгын булдырып, кешеләрне эшли иткән Сәләхиев  Рафик Мансур улының  зур өлеше керде. Без бик рәхмәтле аңа!  Бүгенге көндә аның хуҗалыгында 100 баш савым сыеры бар ( сыерлар белән ныклап 2012 елдан бирле шөгельләнә), бар җирдә тәртип, чисталык хөкем сөрә. 468 гектар җирне дә эшкәртергә өлгерә алар.

 Ял итәсезме соң, дип сорауга:

— Үзеңә үзең эшләгәч, ялкауланып тора алмыйсың. Мин, иртәнге 4 - 5 тә торам. Җәйге чорда гына түгел, бу ел әйләнәсе шулай. Юлда да күп йөрергә туры килә. Авыл, район халкы белән яхшы мөнәсәбәттә яшим. Авылның матур табигате,  саф һава җаныма якын. Мин – бөтен барлыгым белән авыл кешесе ,- ди Рафик Мансурович.

Зөлфия Ибраһимова.