Газ белән сак бул!

Инде барыбыз да бик яхшы белә. Газ белән “Сез” дип сөйләшсәк кенә, ул безне аңлар һәм җылылык биреп, тормышыбызны уңайлы итәр. Газ котелы, колонкасы һәм газ плитәсе – болар бөтенесе дә кеше тормышы өчен уңайлылык белән  бергә зур  куркыныч тудыручы җайланмалар. Аларның төзек булмавы, әз генә тайпылыш белән эшләве дә, безнең сәламәтлегебез һәм гомеребез өчен начар тәмамланырга мөмкин. Әлеге хәвеф-хәтәр булмасын өчен, газ приборларына даими техник карау үткәрелергә тиеш.

Закон буенча, газ приборлары белән сак эш итү, алар белән дөрес куллану абонентның үз җаваплылыгында. Ләкин йорт, квартира хуҗасы газ җайланмаларын, газ приборларын үзләре тикшерергә, төзәтергә тиеш дигән сүз түгел бу! Әлеге гамәл катгый тыела һәм законга каршы бару дип кабул ителә. Һәрбер абонент техник карау үткәрү буенча җаваплы оешма белән килешү - договор төзергә тиеш. “Сабагаз” идарәсенең әлеге өлкәдә аттестация үткән белемле специалистлары-белгечләре план буенча елга бер тапкыр техник карау уздыра. Аларның төп вазыйфалары - газ приборларының дөрес эшләвен тикшерү, төзек булмаган урыннарын табу, тапкан очракта - төзәтү.

Техник карау уздыручы газчы алдында иң зур каршылык һәм уңайсызлык булып квартираларга, шәхси йортларга вакытында керә алмау. Моның сәбәбе – абонентларның төрле сәбәп белән өйдә булмаулары,  хәтта, кайбер очракта , өйдә булып та, газчыларны өйгә кертмәүләре тора. Бу зур хата. Әлеге кешеләр үзләрен генә түгел, күршеләрен дә зур куркыныч астына куя. Бүгенге заманның аңлы-белемле кешесе әлеге вәзгыятне белергә тиеш һәм аңларга бурычлы! “Сабагаз” идарәсенең махсус белеме һәм лицензиясе булган белгечләрен йортларына, квартираларына кертмәгән абонетларга 5000 сумнан 10000 сумга кадәр штраф каралган. Шушындый ук штраф газ приборларын үз белдеге белән алмаштырган, башка урынга күчергән абонентларга да салына ала.  Газ приборларына вакытында килешү-договор төземәгән абонентларны да җаваплылыкка тарту каралган.

Тагын шуны исегезгә төшерәбез - газ плитәләрен бүлмәне җылыту өчен эшләтү зур хата. Аш бүлмәсе, ягу бүлмәләрендә газ приборлары эшләгән вакытта һава алу өчен форточкалар ачарга онытмыйк. Газ приборлары торган бүлмәдә тәртип, чисталык булырга тиешлеген дә истә тотыйк. Аш ташып, май агып  карарлыгы калмаган газ плитәләре хәвеф-хәтәргә бер адым.

  Газ  җиһазларын рәсемдә күренгән ямьсез, җавапсыз дәрәҗәгә җиткермик!  

Хөрмәтле газ белән кулланучы абонентлар! Газ мичләрен кабызыр алдыннан иң элек суыру көчен тикшерү, төтен-вентиляция юлларының төзеклеген, аларның чиста, тыгылмаган булуларын карау, төтен һәм вентиляция каналларындагы суыру көчен даими тикшереп тәртиптә тоту, безнең хәвеф-хәтәрсез яшәешебезнең дөрес кагыйдәсе.

Хәзер табигатьнең көйсезләнә торган вакыты. Көндезләрен кояш кыздырса, төннәрен  салкын юлларны бозландыра, морҗа башларын бәсләндерә. Җылы яктан кошлар кайтып үзләренә җылы урын эзлиләр. Шул сәбәпле, төтен һәм вентиляция каналларының башларына бәс, боз белән капланмасын һәм кошлар оя кормасын  өчен аеруча игътибар белән тикшереп, карап торырга кирәк.

  Әлеге рәсемдәге кебек морҗа башлары кеше гомере бәясенә торырга мөмкин!

  Вентиляция каналларын каплап, томалап кую тормышыбыз өчен аеруча куркыныч!

Хөрмәтле райондашлар! Зәңгәр ягулык кулланучы абонентлар!  Гади генә булып тоелган газ приборлары белән куллану кагыйдәләрен үтәү – безнең имин тормышыбызның төп нигезе булып тора. Без моның белән үзебезнең генә түгел, туганнарыбызның,  якыннарыбызның, күршеләребезнең, шәхси хуҗалыкларда һәм күпкатлы йортларда яшәүчеләрнең дә тормышын, гомерен саклап каласыз! Шуны беркайчан да онытмагыз!

Хөрмәтле абонентлар! Әгәр дә газ исе сизсәгез:

-тиз арада газ приборлары куллануны туктатырга

-газ приборы краннарын һәм газопроводтагы краннарны(газопроводы на опуске) килүче краннарны ябарга

-бүлмәне җилләтү өчен форточка һәм тәрәзәләрне ачарга

-электр приборлары янып торса сүндермәскә, сүнгән булса яндырмаска, мобиль телефонаннан сөйләшмәскә, электрозвоноклар кулланмаска, тәмәке тартмаска!

-квартира, өйдә булган кешеләрне урамга чыгарасы.

- 2-11-04, 104 номерлары аша Авария диспетчерлык хезмәтенә, яки 112 номеры аша ашыгыч хезмәт номерына шалтыратыгыз (экстренная служба).