Горурлан.... ( Татарстан көненә багышлап).

Урманнарың синең, чишмәләрең,
Басу - кырлар, зәңгәр күлләрең.
Күпме яшәсәм дә, моның кадәр,
Башка матурлыкны күрмәдем.

Горурланам Тукайларың белән,
Мәңге сүнмәс утың, Казаным.
Чит илләргә кадәр таралды бит,
Җиңүләрне яулый Камазың.

Иң тырышлар бары синдә генә,
Җитештерә кара алтынын.
Яуда калган Алиш, Җәлилләрең,
Горурлыгы татар халкының.

Башка чит җир миңа кирәк түгел,
Язмышымны сиңа бәйләдем.
Данын көн дә әйтеп җырын суза,
Салаватың, Ришат, Зәйнәбең.

Еракларга тавышларын илткән,
Татар иле, ул синең даның.
Халык йөрәгендә мәңге сүнмәс,
Әлфия апа, Зиннур, Ильһамың.

Мин сөенәм, яшә, Татарстан,
Алга атла барыр юлыңнан.
Тыныч тормышларда яшәгәнгә,
Минтимерең белән горурлан.

Газинур Әхмәтҗанов.
Азнакай шәһәре.
30 август. 2022 ел.