Теләче Информ

Читтә дип читкә тибәрмиләр

Шәдке - Теләче районында үзенчәлекле авыл­лар­ның берсе. Биредә халык тырыш, булдыклы, башкаларга ялынмыйча эшли белә. Бу авылны тагын бер күреп кайту теләге күптән­нән бар иде. Сәфәребез шул якка булганга сөен­дек, тик район үзәгеннән ерак булуы гына хафага салды. Әмма борчылуыбыз юкка булган икән. Юлы булгач... Моңарчы район үзәген­нән 50 чакрым...

Шәдке - Теләче районында үзенчәлекле авыл­лар­ның берсе. Биредә халык тырыш, булдыклы, башкаларга ялынмыйча эшли белә. Бу авылны тагын бер күреп кайту теләге күптән­нән бар иде. Сәфәребез шул якка булганга сөен­дек, тик район үзәгеннән ерак булуы гына хафага салды. Әмма борчылуыбыз юкка булган икән.


Юлы булгач...

Моңарчы район үзәген­нән 50 чакрым ераклыкта урнашкан авылга юлны кыс­картканнар. Турыданрак өр-яңа юл салып куйганнар. Шәд­­ке авыл җирлеге башлыгы Фәрит Кадыйров әйтүенчә, хәзер ике ара 26 километрга гына калган. Киләсе елда быел кул җитмәгән 7 чакрым юлны да төзекләндереп бете­рү планлаштырыла. "Бу - Шә­мәрдәнгә илтүче олы юл. Тауны кисеп салдылар, елга аша салынган күперне генә төзү дә 50 миллионга төште", - дип таныштыра авыл җитәк­чесе үзенең биләмәләре бе­лән.


Урман, ике елга буена сыенып утырган Шәдкенең табигате искиткеч матур. Төзек ихаталы күркәм йортлар, өр-яңадан эшләнгән биналарны күреп сокланып йөрибез. Район башлыгы Илдус Зарипов Шәдкегә озатканда: "Соң­гы биш елда без ул авылда бик күп объектлар тө­зе­дек. Баргач күрерсез. Хө­кү­мәт программаларыннан фай­­да­ланып, 475 миллионлык эш башкарылды", - ди­гән иде.

Реклама


Хәер, Шәдкедә башка­рыл­ган эш күзгә төртеп күр­сәт­мәсәң дә, күрерлек. Шәд­ке авыл җирлегенә кергән Югары Мирәтәк, Олы Ми­рәтәк кенә түгел, тирә-як­тагы Нырсы, Айдар, Сауш авыллары өчен салынган ветеринария пункты да биредә урнашкан. 50 урынлык өр-яңа балалар бакчасы сафка баскан. Бүген анда 36 бала йөри. Спорт заллары, уен бүлмәләре иркен, якты. Дәүләт программасы буенча фельдшерлык-аку­шер­лык пункты төзү бә­хетенә иреш­кәннәр. ФАПны үз урынында калдыру өчен, фельдшерларга башка бинада кабул итәргә туры килә. Бер үк вакытта авыл җирлеге бинасында да үзгәрешләр булган, аңа капиталь ремонт үткә­рел­гән. Быел Бөек Ватан сугышында катнашучыларга куелган һәй­кәлне яңартырга керешкән­нәр. Ул зур бер комплекс булып аякка басачак. Анда сугышка китүче­ләр һәм әйлә­неп кайтучы­ларның исем­нәре уелып язылачак. Бу көн­нәрдә мә­дә­ният йортында да капиталь төзекләндерү эш­ләре азагына җитеп килә. Яңа урындыклар кайтуын гына көтәләр. Яңар­тылган мә­дә­ният үзәген ачу ноябрь аена тәгаенләнгән. "Соңгы елларда авылда төзелеш эш­ләре күп алып барылды. Әмма тузып барган со­циаль-көнкү­реш объектларын сафка бастыру, капиталь төзек­ләндерү хөкүмәт ярдәменнән башка һич кенә дә мөмкин эш түгел. Бик күп программаларны файдаланып, район башлыгы ярдәме белән авылыбыз бик матурланды. Төзек, күр­кәм әйбергә карап тору да күңелле", - дип сөйли Фәрит абый Кадыйров.

"Яшен"ле авыл

Шәдке турында сөй­лә­гәндә, аның мәктәбе, хоккейчылары турында бер-ике сүз әйтмәсәк, мөгаен, дөрес булмас. Бүген мәктәп­тә ике төр­кемдә егетләр командасы, бер төркемдә кызлар хоккей командасы бар. Шәдке егет­ләреннән торган данлыклы "Гром" командасы шактый яхшы уңышларга ирешеп килә. Авылның әнә шулай хоккей белән җен­ләнә башлавына быел 50 ел тула икән. Респуб­лика чемпионнарына уңыш­лары өчен 2013 елда "Татнефть" ярдәме белән менә дигән хоккей тартмасы бүләк итә­ләр. Шул шар сугучы егет­ләр­нең берсе, авылда төп­ләнеп үз эшен башлап җи­бәр­гән Булат Гафуров белән дә очраштык. Булат, яшь кенә булуына карамас­тан, эшмәкәр дә, күп балалы әти дә, бер үк вакытта авыл җирлегендә депутат та икән. Ташландык фермаларны тө­зекләндереп, симертү өчен үгезләр асрый. Шәри­гать кануннары нигезендә чалып, хәләл ит буларак урнаштыру эшен башлап җибәргән. "Алдагы елда 100 баш сыерга исәпләнгән терлек торагын төзеп бетерәбез. Күрше авылда урнашкан ул. Әнием Гө­лүсәгә ярдәмче буларак башлаган идем, хәзер күп эшне үзем башкарам. Чәчү­лек җир­ләребез бар. Эш күп булса да, спортны ташлаганым юк. Авылда эшлибез дә Казанга барып уйныйбыз. Казан хоккей клублары арасында Шәд­ке егетләренең сынат­кан­­нары юк", - ди Булат, елмаеп.


"Алмашка әнә шундый кадрлар үсә безнең. Башка авылларга караганда, Шәд­ке 20 елга алдан бара. Сере нәрсәдә дисезме? Авыл районнан ерак булган. Гомер буе беркемнән өмет итмә­гән, үз көче белән яшәгән. Әнә шулай сыналган, ныгыган ул. Хәзер кайсы гына йортка килеп керсәң дә, һәркемнең - үз шөгыле. Кем­дер пластик тә­рәзә ясый, кемдер терлек тота, умартачылык белән шө­гыль­ләнүчеләр күп, - дип сөйли Фәрит Кадыйров. - Шәд­кенең үзендә генә дә пластик тәрәзә ясый торган ике цех бар, авылда 47 шәхси трактор, 8 "КамАЗ" исәпләнә, терлек саны арта бара. Үз көч­ләре белән йорт салып чыгалар. Хәзер шәхси хуҗа­лыкларда күбрәк тө­зек­­лән­дерү, заманча уңай­лык­лар тудыру буенча эш алып барыла. Эшмәкәр Расим Гал­ләмов ярдәме белән мәчет тә тө­зекләндерелде. Район башлыгы Илдус Зарипов та чит­тәге авыл дип читкә тибәр­мәде безне, һәр­даим булышлык күрсәтеп килә. Тырышып яшәүчеләр­не хуҗалар да күрә белә".

Рәсимә Галиева

http://www.vatantat.ru/index.php?pg=2468

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: