Дүрт сәгатьлек тамаша, ягъни, 30 апрель көнне булган Гала-концерттан 400 фото

30 апрель көнне район мәдәният йортында районыбызның яңадан торгызылуына 25 ел тулу уңаеннан игълан ителгән "Туган җирем - Теләче" сәнгать фестиваленең гала-концерты булып узды.

Өч ай барган фестиваль концертында барлыгы 1370 үзешчән сәнгатькәр катнашты. Ә гала-концертта сәхнәгә бүләкләнергә 319 катнашучы күтәрелде, шуларның кырыклабына гына концертта чыгыш ясау бәхете тәтеде.

Концертның беренче бүлегендә авыл җирлекләреннән килгән үзешчәннәр чыгыш ясап бүләкләнсә, икенче өлештә оешма-предприятиеләрдә хезмәт куючылар кабат тамашачы алдында үзләренең җыр-биюгә, нәфис сүзгә булган осталыкларын күрсәттеләр.

Аларның хезмәтләре буш калмады, төрле дәрәҗәдәге дипломнар, акчалата призлар белән бүләкләнделәр.

Авыл җирлекләре арасында иң яхшы чыгышлар Алан, Баландыш, Үзәк авыл җирлекләренеке дип табылса, оешма-предприятиеләр арасындагы бәйгедә беренчелекне яулаучы оешма табылмаган. Мәртәбәле жюри икенче урынга полиция, мәгариф бүлекләрен лаек дип тапкан. Өченче урында район үзәк хастаханәсе коллективы.

Гала-концерт үзе дүрт сәгатькә сузылса да, берәүне дә ялыктырмады, киресенчә, тамашачылар биредән йөрәкләренә дәрт, беләкләренә ел буена җитәрлек көч алып кайтып киттеләр.

Фәнил Нигъмәтҗанов.

Автор фотолары.