Медведев коронавирустан мәҗбүри вакцинацияләүне кертү ихтималын әйткән

Россия хакимияте коронавирустан прививка ясатуның ихтыяри булуыннан чыгып эш итә, әмма кайбер очракларда вакцинация мәҗбүригә әйләнергә мөмкин. Бу хакта Иминлек советы рәисе урынбасары Дмитрий Медведев Петербург халыкара юридик онлайн-форумында белдергән, дип хәбәр итә РИА Новости.

“Кайвакыт дәүләт мәнфәгатьләрендә, халыкның күпчелеге мәнфәгатьләрендә вакцинация гомуммәҗбүригә әйләнергә мөмкин”, -– дигән Медведев. Аның әйтүенчә, юристларга да, вакцинация белән турыдан-туры шөгыльләнүчеләргә дә әлеге тема буенча уйланырга-эшләргә туры киләчәк.
Исегезгә төшерәбез: бүгенгә Россиядә коронавирустан дүрт вакцина теркәлгән. Гамалея исемендәге үзәк тарафыннан эшләнгән “Спутник V” дөньяда иң беренче булып теркәлде (2020 елның 11 августында). “Эпиваккорона” – 2020 елның октябрендә, “Ковивак” – 2021 елның февралендә, бер компонентлы “Спутник лайт” вакцинасы әле күптән түгел генә теркәүгә алынды.

Ватаным Татарстан