26 нчы апрель - татар дөньясы өчен истәлекле дата, бөек шагыйребез Габдулла Тукайның туган көне

Район халкының күпчелеген татарлар тәшкил итсә дә, җирлегебездә руслар һәм башка милләт вәкилләре дә яши. Һәр милләтнең үз теле, үз гореф-гадәтләре. Тоткан диннәребез дә төрле. Әмма, шунысы игътибарга лаек, кемнең кайсы милләттән булуына карамастан, республикабызда төрле конфессия вәкилләре бер-берсен ихтирам итеп, үзара ярдәмләшеп яши.

"Рус белән тормыш кичердек сайрашып,

Тел, лөгать, гадәт вә әхлак алмашып",

дигән Тукай. Кешелек дөньясында үсеш, эволюцион процесслар аралашу хисабына бара. Төрле халыклар бер-берсенең матур гадәтләрен, тәрбия ысулларын өйрәнә һәм кулланылышка кертә. Милли гореф-гадәтләрме, дини йолалармы - берсе дә начарлыкка өйрәтми. Иң мөһиме - башка конфессияләрнең үрнәк булырдай, өлге итеп алырдай сыйфатларын күрә, бәяли белергә, ихтирам итәргә һәм шул ук вакытта үз йөзеңне югалтмыйча, миллилекне саклап калырга кирәк!