Айлык хезмәткә нәтиҗә ясалды

Муниципаль район башлыгы Нәҗип Хаҗипов җитәкчелегендә узган киңәшмәгә авыл хуҗалыгы предприятиеләре, крестьян-фермер хуҗалыклары җитәкчеләре, ферма мөдирләре, зооветеринария белгечләре һәм икътисадчылар чакырулы иде. 

Киңәшмәдә көн тәртибендә каралган мәсьәләләр буенча район авыл хуҗалыгы һәм азык-төлек идарәсе җитәкчесе Ралиф Низаметдинов, идарәнең терлекчелек буенча консультанты Резидә Фәрхуллина һәм җаваплылыгы чикләнгән “Игенче” ширкәтенең терлекчелек буенча директор урынбасары Ренат Абушаев чыгыш ясады. Йомгаклау сүзе белән муниципаль район башлыгы Нәҗип Хаҗипов чыкты.

Октябрь аенда терлекчелектә куелган хезмәт нәтиҗәләре буенча авыл хуҗалыгы предприятиеләре арасында үткәрелгән ярышта беренче урынга җаваплылыгы чикләнгән “Агролак” ширкәте терлекчеләре чыкты. Мактаулы күчмә приз - Ат сыны белән Теләче муниципаль районы башлыгының Рәхмәт хаты хуҗалык җитәчесе Фәрит Гыйләҗетдиновка, җылы одеаллар ширкәт терлекчеләренә тапшырылды. Исегезгә төшерәбез, шәткелеләр сентябрь аеның да җиңүчесе иде.

Киңәшмә турында тулырак “Теләче” газетасының киләсе саныннан укый аласыз.

Фәнил Гаязов.