Әлфия Авзалова исемендәге III Халыкара фестиваль конкурсында катнаштылар

Ул сәләтле яшьләргә ярдәм итү, аларның иҗади үсеше өчен шартлар тудыру һәм милли татар сәнгате традицияләренә нигезләнгән һөнәри осталыкны камилләштерү максатыннан оештырыла. Фестиваль – конкурсның Гала-концерты 2023 елның 23 октябрендә Муса Җәлил исемендәге Опера һәм балет театрында узачак.

         Быелгы конкурсның финалында Татарстан, Башкортостан Республикаларыннан, Мәскәү шәһәреннән 113 җырчы катнашты. Шулар арасында Теләче данын яклап чыгыш ясаган,  Балалар сәнгать мәктәбеннән “Чулпан” бию төркеме 3 дәрәҗә Лауреат, район мәдәният йортыннан “Ак калфак” бию төркеме – 3 дәрәҗә Лауреат, Рада Әхмәтгаязова Легендар җырчыбыз репертуарыннан “Гармунчыга” дип исемләнгән татар халык җырын башкарып, 2 дәрәҗә Лауреат, балалар иҗат үзәгеннән “Сюрприз” балалар үрнәк бию коллективы финалистлар булып танылдылар.

         Җиңүчеләрне чын күңелдән котлыйбыз! Һәм, артистларыбызга иҗат итәргә, яңа урләр яулау өчен бөтен шартларны тудырган, районыбызның мәдәният бүлегенә рәхмәтләребезне белдерәбез!