Яңа торак, тормышка яңача караш

Муниципаль район башлыгы Нәҗип Хаҗипов җитәкчелегендә Казаклар авылы клубында узган пленар өлештә иң беренче чиратта берничәк элек кенә район үзәге Теләчедә һәм авылларыбызда булып узган  милли бәйрәмебез -  Сабантуйларны үткәрүгә нәтиҗә ясалды. Болардан тыш,  күмәк чарада игеннәрне тәрбияләү, терлек азыгы әзерләү, терлекләрне кардаларга чыгару, торакларны дезинфекцияләү, ашлык суктыру комбайннары ремонты мәсьәләләре дә калку күтәрелде. 

Киңәшмәдә әлеге темаларны яктыртып, район авыл хуҗалыгы һәм азык-төлек идарәсе җитәкчесе Ралиф Низаметдинов, район ветеринария берләшмәсе җитәкчесе Илгизәр Гарипов чыгыш ясады. Йомгаклау сүзе белән муниципаль район башлыгы Нәҗип Хаҗипов чыкты.

Май аенда терлекчелек тармагында куйган хезмәт нәтиҗәләре буенча  авыл хуҗалыгы предприятиеләре арасында үткәрелгән рейтингта (ул 14 төрле параметр белән билгеләнә) беренче урынга җаваплылыгы чикләнгән “Чулпан”  ширкәте терлекчеләре чыкты.  Исегезгә төшерәбез, апрель аенда да алар җиңүче булган иде. Мактаулы күчмә приз - ат сыны белән Теләче муниципаль район башлыгының Рәхмәт хаты хуҗалык җитәкчесе урынбасары Ленар Галиәхмәтовка, терлекчеләргә исә җылы юрганнар тапшырылды. Бүләкләрне ияләренә муниципаль район башлыгы Нәҗип Хаҗипов тапшырды.

Киңәшмәнең практик өлеше исә җаваплылыгы чикләнгән “Игенче” ширкәтенең 504 башка исәпләнеп төзелгән, үз саву залы булган өр-яңа сыерлар торагында узды. Эшчәнлеге цифрлы технологияләргә нык бәйләнгән фермада бүген 110 сыер асрала. Биредә аларның санын ел азагына 504 башка җиткерергә планлаштыралар. “Хәерле сәгатьтә! Теләкләребез кабул булсын!” - диеште семинарда катнашучылар. Хәзер һәр сыердан 18,5 килограмм сөт савып алырга ирешәләр. Болардан тыш, семинарда бер-бер артлы төзелеп килүче симертү мәйданчыклары да үрнәк итеп күрсәтелде.

Фәнил Гаязов