Район яңалыклары
Хуш килдең, Нәүрүз!
Бүген, ягъни 20 март көнне, районыбыз авылларында, шул исәптән район үзәге Теләчедә дә Нәүрүз бәйрәме гөрләде. Теләчелеләрне Нәүрүз бәйрәме белән муниципаль район башлыгы Нәҗип Хаҗипов тәбрикләде.
- Бүген барча төрки дөнья иң гүзәл бәйрәмнәрнең берсен - Нәүрүзне каршы ала. Биредә дә бәйрәмне матур итеп оештырганнар. Буранлы, салкын һәм озын кыштан соң, халык күңел ача, ял итә, дуслар белән очраша. Күргәнегезчә, һава торышы да бик уңай тора: үзе җылы, кояшлы... Яз җитә, димәк, тереклек уяна дигән сүз. Хәере белән килсә иде! Икмәкле ел булсын ул. Илләребез имин булсын да, тыныч тормышларда шатланып яшәргә язсын, - диде ул, район мәдәният йорты каршында җыелган халыкка мөрәҗәгать итеп. Бу һәркем өчен дә кадерле, изге теләк иде.
Әлеге бәйрәмнең төп хуҗасы – Нәүрүзбикә килеп, теләчелеләрне бәйрәм белән котлады. Кыш бабай белән озак кына тарткалашканнан соң, аны китәргә мәҗбүр итте. Казаннарда Нәүрүз пылавы пеште, коймаклар чыжлады. Бәйрәм сәхнә осталарының күңелле җыр-биюләре, гармун моңнары, балалар өчен оештырылган төрле спорт уеннары белән дәвам итте.
Фәнил Гаязов.
Следите за самым важным и интересным в Telegram-каналеТатмедиа
Нет комментариев