Рөстәм Миңнеханов район башлыкларына урман янгыннары чыгуга юл куймаска әмер бирде

Бу турыда ул республиканың Министрлар Кабинетында узган киңәшмәдә әйтте. Район башлыкларын ул янгыннарны «катгый кисәтергә» өндәде.

«Бу тема мине бик борчый, сезнең дә күбегезне борчыйдыр. Әгәр телевизор карасагыз, бөтен җирдә янгыннар. Без әлегә бирешмибез», – диде ул.

Гадәттән тыш хәлләр министрлыгы һәм ТР Урман хуҗалыгы министрлыгы алдында янгыннарга юл куймау бурычы тора, әмма муниципаль хакимиятләр катнашыннан башка алар аны үтәп чыга алмый, дип ассызыклады республика җитәкчесе. «Бу безнең уртак бурыч. Бездә янгыннарга юл куярга ярамый, катгый кисәтегез. Сездән башка моны беркем дә эшләмәячәк. Таләпчән чаралар һәм төгәл, тиз реакция генә безгә бу бурычны хәл итәргә мөмкинлек бирәчәк», – дип ассызыклады Миңнеханов.

Исегезгә төшерәбез, кичә Татарстанның Гидрометеорология һәм әйләнә-тирә мохитне күзәтү идарәсе републикада урман янгыннарының гадәттән тыш куркынычы турында кисәтте, кисәтү 29 августка кадәр озайтылды.

Чыганак:https://tatar-inform.tatar/news/rostam-minnexanov-raionnarga-urman-yangynnary-cyguga-yul-kuimaska-amer-birde-5858982

Фото: интернеттан