Кәҗә сөте эчкән кеше корычтан нык була

Кәҗә сөтенең файдасы турында сөйләп тә торасы юк. Без галимнәрнең галиме дип санаган Әбугалисина кәҗә сөтенең файдасы турында күп язган. Ул сәламәтлекне һәм аек акылны сакларга ярдәм итә, дигән мәшһүр табиб. Борынгы мисырлылар исә кәҗә сөтен нервларны тынычландыру чарасы буларак кулланганнар. Гиппократ үз авыруларын чахоткадан кәҗә сөте белән дәвалаган. Швейцария курортларында ял итүчеләр бүген аны анемия, рахит авыруларыннан котылу юлы буларак кабул итә. Аны кулланып карау кирәк, файдасы һичшиксез сизелә. Бронхиаль астма, баш өянәге, аллергия, бавыр, ашказаны авыруларының барлык төрләре, күздәге катаракта һәм башка күп төрле терапевтик рухтагы авырулардан шифа, ди табиблар. Кәҗә сөте эчкән кеше корычтан нык була, дип тә ышандыра әле бабайлар.