Ташкабактан торт рецепты

Ташкабактан (кабачки) нәрсә генә ясап булмый, кайнар ризыклардан алып татлы кайнатмаларга кадәр. Турап катырып куйсагыз, кыш көннәрендә дә кулланып була. Ашлар, закускалар, салатлар, татлы ризыклар, пицца - барсын да санап бетерәм димә!

Ташкабакның файдасы турында, шулай ук, бик күп сөйләп була. Әлеге яшелчә С,В витаминнарына, кальций, магний, фосфорга бай. Ташкабакны төшләре, кабыгы белән пешерергә киңәш итәләр. Бу очракта ул аеруча да файдалы була.

Без татлы, баллы тортларга ияләшкән. Ташкабактан ясалган торт закуска өчен менә дигән ризык! Салатлар да читтә торсын. Шулай итеп, безгә кирәк булачак:

ташкабак, йомырка, он,помидор, сарымсак, майонез яки каймак, сыр,укроп, петрушка, көнбагыш мае.

Пешерү тәртибе:

1. Бер кечкенә ташкабакны угыч аша үткәрәбез, тоз сибеп куябыз.
2. 1-2 йомырканы яхшылап болгатканнан соң, ташкабак янына салабыз һәм бутыйбыз.
3. Ваклап туралган укроп, он салабыз. Камыр каймак куелыгында булырга тиеш.
4. Камырыбыз әзер булгач, кызган табага көнбагыш мае салып, 3-4 зур коймак пешерәбез. Майны күп салырга тырышмагыз, артык майлы булмасын. Коймакларны суынырга калдырабыз.
5. Сарымсакны, сырны вак угыч аша чыгарабыз. Ваклап туралган укроп, майонез салып, барлыкка килгән массаны яхшылап болгатабыз. Әлеге «крем» бик куе булмаска тиеш.
6. Торт ясыйбыз. Һәр катлам саен «крем» сылыйбыз, арасына ярымтүгәрәкләп туралган помидорларны төзәбез. Яраткан кеше, икенче катламда кыздырылган баклажан да кулланырга мөмкин.
7. Тортның өстен уылган сыр, петрушка яки укроп белән бизибез.

Реклама

Ашларыгыз тәмле булсын!

Татар Тодау