Белмәгән түгел, белгән гаепле

Район авыл хуҗалыгы һәм азык-төлек идарәсе җитәкчесе Ралиф Низаметдинов җитәкчелегендә узган һәм крестьян-фермер хуҗалыклары чакырулы булган һәм аларның эшчәнлегенә бәйле рәвештә соңгы вакытта районда булып үткән ике тикшерү нәтиҗәләре каралды. Тикшерү төркемендә Татарстан Республикасы Президенты Аппараты, Татарстан Республикасы Авыл хуҗалыгы һәм азык-төлек министрлыгы һәм Татарстан Республикасы Эчке эшләр министрлыгының икътисадый җинаятьләргә һәм ришвәтчелеккә каршы көрәш бүлеге хезмәткәрләре эшләде.

Исегезгә төшерәбез,  хәзер районда 62 крестьян-фермер хуҗалыгы эшләп килә. Тикшерүчеләр тарафыннан шуларның байтагына эшчәнлекләрендәге кимчелекләр күрсәтелгән. Берәүләр үз эшчәнлеге турындагы хисапны контроль органнарга вакытында җибәрмәсә, икенчеләре -  сатып алган авыл хуҗалыгы техникасын теркәмәгән, өченчеләре -  дәүләт ярдәме белән төзегән ферма бинасын рәсмиләштерелмәгән, дүртенчеләре - килешүдә терлекләренең баш саннары килешүдә каралганнан ким, бишенчеләрнең - төзегән биналарының типлары белән модульләре кәгаздәгесе белән чагышмый. Кыскасы, эт-баш, сыер-аяк. Кимчелекләр киңәшмә барышында адреслап аталып, һәр фермерга аларны якын киләчәктә бетерү, хаталарны башкача кабатламау бурычы куелды. Дөрес, берәү дә хатадан хали түгел. Әмма белмәгән түгел, белгән гаепле диелә халкыбыз мәкалендә.