Коронавирустан үлүчеләр саны буенча яңа максимум теркәлгән

Узган тәүлектә Россиядә коронавирус инфекциясеннән 936 кеше вафат булган, бу – яңа максимум. РИА Новости агентлыгы оператив штаб мәгълүматларына таянып шул хакта хәбәр итә.

Аерым алганда, Мәскәүдә – 71, Санкт-Петербургта – 55, Свердловск өлкәсендә 46 кешенең гомере өзелгән. Моннан алдагы рекорд (929) 6 октябрьдә теркәлгән иде, кичә 924 кешенең вафат булуы хакында хәбәр ителде. Шул рәвешле, пандемия башланганнан алып әлеге чирдән үлгән кешеләрнең гомуми саны 214 485кә җитте.