Татарстанда биш ел эчендә Россиянең башка төбәкләреннән абитуриентлар саны 20%ка арткан

Соңгы биш елда Россиянең башка төбәкләреннән Татарстан вузларына укырга керергә теләүчеләр саны 20% ка арткан. Бу хакта «Татар-информ»га ТР Мәгариф һәм фән министрлыгының югары белем бирү бүлеге башлыгы Линар Яруллин хәбәр итте.

"БДИның төп чоры әле тәмамланмаган, ул 2 июльгә кадәр дәвам итәчәк. Тик инде хәзер үк имтихан нәтиҗәләрен белгән чыгарылыш сыйныф укучылары документларны югары уку йортларына тапшыра. Мин кичә КФУ, КХТИ, КАИга шалтыраттым, миңа абитуриентларның гариза бирүләрен хәбәр иттеләр. Моннан тыш, документлар шулай ук Россиянең башка төбәкләреннән дә актив рәвештә онлайн килеп тора», - дип сөйләде агентлыкның әңгәмәдәше.

Линар Яруллин фикеренчә, БДИның төп чоры тәмамланганнан соң, 2 июльдә вузларга абитуриентлардан гаризалар саны артачак.

"Вузларга документлар 29 июльгә кадәр кабул ителәчәк, кайбер чыгарылыш сыйныф укучылары әле кая укырга керергә дип уйлый. Әле барысы да аттестатлар алмады, аларны узган атнада гына бирә башладылар", - дип билгеләп үтте ул.

Мәгариф һәм фән министрлыгының югары белем бирү бүлеге башлыгы, укырга керүче бер үк вакытта биш вузга кабул итү турында гариза бирү хокукын саклый, дип искәртте. Шул ук вакытта югары уку йортына абитуриенттан 10 юнәлеш буенча документлар кабул итү хокукы бирелә. Элек абитуриент документларны бары өч белгечлек буенча гына бирә ала иде.

«Әмма вузлар бу санны үзләре билгеләргә хокуклы. Мин кабул итү комиссияләренә шалтыраттым. Кайбер югары уку йортлары  биш юнәлешкә гариза алырга карар иткән, әмма 10ны калдыручы оешмалар да бар. Әлегә  иң популяр юнәлешләр турында сөйләргә иртәрәк, әмма узган елга караганда, документларның күбесен информатика, педагогика, шулай ук техник белгечлекләргә тапшырганнар", - дип ассызыклады Линар Яруллин.

Вузларда кабул итү кампаниясе 20 июньдә башланды һәм көндезге бюджет формасына 17 августка кадәр дәвам итәчәк.

Быел югары уку йортларына документлар тапшыру механизмы киңәйтелде. Хәзер моны оешманың электрон мәгълүмат системасы ярдәмендә яки дәүләт һәм муниципаль хезмәтләрнең бердәм порталында «Вузга онлайн керү» суперсервисы аша башкарырга мөмкин. Традицион документлар кабул итү шулай ук көчендә кала.

Конкурс исемлеге исемсез булачак, ягъни килүчеләрнең фамилиясе, исеме, атасының исеме күрсәтелмәячәк. Моның урынына - СНИЛС номеры, яки - керүченең уникаль коды күрсәтеләчәк.

Төп этапның икенче дулкыны гамәлдән чыгарылды. Әгәр элек беренче этапта бюджет урыннарының 80% ы тулса, икенче этапта калган 20% ы тутырыла иде. Хәзер укырга керүнең төп дулкыны бер генә булачак.

Беренче булып югары уку йортлары олимпиадачыларны, ташламалары булган абитуриентларны һәм целевик студентларны кабул итәчәк. Аннары конкурс исемлегеннән төп бюджет урыннарына абитуриентлар кабул ителә. Конкурс исемлекләре хәзер көн саен кимендә биш тапкыр яңартылачак. Бу абитуриентларга рейтингта үз позициясе турында актуаль мәгълүмат алырга мөмкинлек бирәчәк. Элек мондый яңартуны көнгә бер генә тапкыр уздырганнар иде.

Татарстан вузларына 2021-2022 уку елына 20 меңнән артык бюджет урыны бүлеп бирелгән. Бу узган ел белән чагыштырганда 20% ка диярлек күбрәк, дип хәбәр итте «Татар-информ» МА.