Юллар — аның язмышы
Юллар... Күбебез алар буйлап сәяхәт итәргә, яңа җирләр күрергә яратадыр, мөгаен. Ә менә шофер һөнәрен сайлаучылар өчен юл — хезмәт тә, тормышның үзе дә. Елның теләсә кайсы тәүлегендә юлда булучыларны үз һөнәрләренә гашыйк булу гына тотып тора дисәң дә ялгыш булмас. Нинди генә һава торышы — күз ачкысыз буранмы, яңгырмы яки бозлавыкмы — булмасын, алар һәрвакыт хезмәттә. Билгеле, озын юллар гел ансант кына булмый, анда катлаулы, көтелмәгән хәлләргә дә еш очрарга туры килә. Теләче авылында яшәүче, мәктәп эскәмиясеннән үк руль артына утырган Алмаз Закиров үзенең хезмәте һәм иксез-чиксез юллары турында сәгатьләр буе сөйли ала.
