Райондашларыбыз "Без - 41нче ел балалары" фильмында катнаша

Әлеге фильмда безнең райондашларыбызга да катнашырга насыйп булды. "Туган авыл" ял итү һәм күңел ачу комплексы җитәкчесе Рифкать Шафиков җитәкчелегендәге команданы экраннарда күрә алачакбыз!

Татарстанның халык язучысы Мөхәммәт Мәһдиевнең «Без – кырык беренче ел балалары» дип исемләнгән беренче повесте 1968 елны дөнья күрде. Укучылар һәм әдәби тәнкыйть тарафыннан татар прозасында яңалык итеп кабул ителгән әсәр буенча кино да төшерелә.

Сценарийның авторы – Әлфирә Маһдиева, режиссеры Әмир Гәлиәскәров, продюсеры Миләүшә Айтуганова.

Миләүшә Ләбибовна сүзләренчә, әлеге китапны ул бик авырлык белән генә тапкан. Әлеге әсәрне экранлаштыру аның күптәнге хыялы булган. Ул, гомумән, классик әдәби әсәрләргә битараф түгел.