Шадриков татарстанлыларны санитар-экологик икеайлыкка чыгарга чакырды

Татарстанда 1 апрельдә санитар-экологик икеайлык башлана. Бүген Казанда узган брифингта ТР Экология һәм табигый ресурслар министры Александр Шадриков волонтерларны, активистларны һәм республика халкын актив катнашырга чакырды.

"Табигатьне саклау эшендә фикердәшләр — халык, волонтерлар, иҗтимагый оешмалар активистлары арта бара. Быел да без аларның ярдәменә өметләнәбез", - диде ул.

Министр билгеләп үткәнчә, республиканың бай табигый мирасы бар — бездә 1 млн гектардан артык урманнар, 500 мең га аеруча саклаулы табигать территорияләре, 36 меңнән артык су объекты бар, алар төбәк территориясенең 6,4% ын биләп тора. Әйләнә-тирәбездә табигать ял итү өчен уңайлы шартлар тудыра. Әмма уңайлылык кешенең даими яшәү урыннарында — шәһәрләрдә һәм авылларда да булырга тиеш, дип саный Шадриков.

Яз көне, кар төшкәндә, ишегалларында һәм юлларда төрле көнкүреш чүп-чары кала. Санитар-экологик икеайлык вакытында республика халкы үз яшәү урыннарында тәртип урнаштыру өчен көчләрен берләштерергә тиеш.

Шунысын да билгеләп үтәргә кирәк, узган ел, изоляция аркасында, икеайлык коммунальчылар, юлчылар һәм муниципаль берәмлек хезмәткәрләре җилкәсенә төшә. Узган елларда республикада икеайлык чорында территорияләрне җыештыру буенча акцияләрдә 1 миллионнан артык кеше катнашкан. Узган ел массакүләм өмәләрдә 200ләп казанлы катнашкан.

Чыганак: Татар-Информ