Зиннәтулла Билалетдинов: "Иң яхшы булуыбызны исбатларга тырышам" (әңгәмә)

- Уфада серия төгәлләнгәч, сезон нәтиҗәсе канәгатьлек бирде, дигән идегез. Фикерегез үзгәрмәдеме?

- Тулысынча канәгатьлек кичереп булмый, әлбәттә. Әмма аерым бурыч-максатлар үтәлде. Нәтиҗә сөендермәде, әмма уенга бәйле планнар тормышка ашты. Составка үзебезнең мәктәптә тәрбияләнгән хоккейчыларны да шактый кертә алдык. Ә бит соңгы бурыч сезон башында куелган төп максатларның берсе иде. Көчсез көндәшкә дә җиңелмәдек. Алар финалга чыгу өчен көрәш алып бара. Сезон уңышсыз ук түгел, шул ук вакытта канәгатьсезлек тә бар.

- Плей-офф алдыннан Татарстан Президенты белән очрашу ышаныч өстәдеме?

- Әлбәттә, ул спортны яхшы аңлый. Һәм бу ярдәм командага көч өсти, югары максатларга этәрә.

- "Салават Юлаев"ка каршы серияне тигезли алдыгыз, хәлиткеч матчта алга да чыктыгыз. Нишләп җиңеп булмады?

- 8:0 исәбе белән җиңүгә ирешкәннән соң егетләрне тынычланды, дип әйтә алмыйм. Психологик яктан да әзер идек. Ләкин Уфа әлеге матчка "әдәпсезрәк" рәвештә әзерләнгән иде һәм шул кайбер үзгәлекләре нәтиҗәсендә җиңүгә ирештеләр. Уен буенча без оттырмадык, ләкин бу хоккей.

- Капкачылар турында ни әйтерсез?

- Башта ук серияне Галимов башлый, дидек. Ул килгәч капкада тотрыклылык сизелә башлады, үзе дә берничә яхшы матч бүләк итте. Әмма Уфада без күп алка керттердек. Үзебездә бер уен җиңдек тә, кабат җиңелдек. Шуннан Гариповны бастырырга булдык. Эмиль яхшы уйнады, шул ук вакытта Галимовның температурасы күтәрелде. Ә Рюнняска килгәндә, тырышлыгы, яшьләргә үрнәк булуына дәгъвам юк. Әмма барып чыкмады.

- Сезон башында авырлыклар булачагын, уңышсызлыклар көтәчәген фаразлаган идегезме?

- Һичшиксез, чөнки без төп составтагы 11 уенчыны алмаштырдык. Ә алар арасында узган сезонда команданы финалга алып чыккан капкачы Нильссон, төп сакчылар Никулин белән Медведев, соңрак Денисов һәм һөҗүмчеләр дә бар. Һәр позициядә дә кыенлыклар туды. Иң авыры - сакта булды. Срставның яхшырак уйнавы өчен вакыт кирәк иде. Күп алка керттердек, шулай да даими чемпионат азагына тиешле дәрәҗәдәге уен күрсәтә башладык.

- Плей-оффта сезон дәвамында әйдаман булган уенчылар (Меллер, Азеведо) түгел, ә Ткачев, Лукоянов һәм башкалар уен җебен үз кулларына алды. Моны ничек аңлатасыз?

- Соңгыларын әйдаманнар рәтенә кертергә иртәрәктер әле. Әмма кайбер аерым матчларда аларның лидерлык сыйфатлары күзгә чалынды. Һәм ул сыйфатларны үстерергә кирәк. Оскар Меллер бит җитди операция кичергән иде.Шуңа да бозда тиешле дәрәҗәдәге уен күрсәтә алмады. Михаил Варнаков белән дә шундый ук хәл. Анысын сезон дәвамында "җилкәсез" уйнады, дияргә була. Имгәнүләр безне көчле уенчылардан - Дялога, Ткачев, Малыхин, Глуховтан башка калдырды.

- Сезнең белән гамәлдәге килешү бар. Алда торган сезонда "Ак Барс"та калырмын дигән ышаныч бармы?

- Бу хакта уйлаганым да юк. Үз эшемне яратам һәм аны сыйфатлы башкарырга тырышам. Эшлим дә - эшлим. Миңа Казанда һәрвакыт уңайлы булды, хәзер дә шулай. Һәр сезонда, ирешкәннәргә дә карамыйча, үзебезнең иң яхшы булуны исбатларга тырышам. Әлеге уңыш командага кагылышы булганнарның бердәм эше нәтиҗәсендә генә туа.

Интертат