Карны кая куясы?
Быел җәй эссе булырга охшаган. Халык сынамышларына ышансаң, 29 гыйнварда көн суык булса, җәен кояш кыздырачак. Илнең күпчелек төбәкләрендә, шул исәптән Татарстанда, синоптиклар төнлә 18–20 градуска кадәр салкын вәгъдә иткән.
Урамда чын кыш: үзе карлы, үзе кояшлы, салкын җил битне чеметтереп алырга да күп сорап тормый. Мондый һава торышы киләсе атна азагына кадәр сакланачак, дип вәгъдә итә синоптиклар. Явым-төшемнәр капчыгы да ертылган, ахры. Илнең Гидрометеорология һәм әйләнә-тирәне күзәтү идарәсе вәкиле Людмила Паршина сүзләренә караганда, алдагы берничә көндә генә дә кар катламы тагын 5–10 сантиметрга “үсәргә” мөмкин.
Мәскәүдә бу яңалыкка бер дә шатланмаслар кебек. Узган ялларда ил башкаласында моңарчы күрелмәгән күләмдә кар яуган. Алай да гадәттән тыш хәл килеп чыкмаган. Саратовтагы кебек әнә. Узган атна ахырында шәһәрдә ишеп кар яву аркасында, мәктәпләрдә укуны туктатып торганнар. Балалар ял итсә дә, укытучыларның – эш көне. Шуңа күрә мәктәпләрнең берсендә мөгаллимнәрне урамга кар көрәргә чыгарып җибәргәннәр. Алай гына да түгел, 20 градус салкында карны чүп капчыгына тутырып түгәргә кушканнар. Хезмәткәрләрнең берсе эш барышын фотога төшереп, социаль челтәргә урнаштырган. Бу исә җәмәгатьчелектә зур шау-шу куптарды. Укытучыларның моннан башка да эше җитәрлек, дип яздылар интернетта. Шәһәр мэриясе кышкы “өмә”не ирекле гамәл дип аңлатырга тырышса да, низаг Саратов хакимиятенең мәгариф бүлеге җитәкчесен эшеннән алу белән тәмамланды.
Татарстанда бу көннәрдә ишеп кар явудан куркасы юк. Һәрхәлдә, синоптиклар шулай дип ышандыра. Атна уртасына кадәр төнлә – 20, көндез исә 12 градуска кадәр салкын вәгъдә иткәннәр. Атна азагында бераз җылытачак һәм кар яварга мөмкин.
Следите за самым важным и интересным в Telegram-каналеТатмедиа
Нет комментариев