«Ел хатын-кызы. Ел Ир-аты: Хатын-кыз карашын» республика бәйгесенең зона ярышларында катнаштылар

Теләче муниципаль районыннан, әлеге чарада, Теләче муниципаль районы башкарма комитеты җитәкчесе урынбасары Динар Гиниятуллин,  районның ветераннар Советы рәисе Рәис Заһидуллин, Россия хатын-кызлар берлеге төбәк бүлегенең Теләче районы хатын-кызлар советы рәисе Әнисә Туктамышева, конкурста катнашучылар, аларның җанатарлары, «Сюрприз» бию коллективы катнашты.

Ә төп катнашучылар –  «Ир-ат - игелекле йөрәк» номинациясендә сугыш ветераны Алексей Иванович Писарев һәм Газизова Рузалия Шамилевна «Хатын-кыз - ана» номинациясендә. 

Конкурсантларның барысы да тормышта үз урыннарын тапкан, уңышларга ирешкән, башкаларга үрнәк, остаз булырлык шәхесләр. Алар арасыннан иң-иңнәрен сайлап алу жюрига бер дә җиңел булмагандыр.  Көне буе барган бәйге, зур бәйрәмгә әверелде. Уйландырды, елатты, көлдерде... Сокландырды! Күпләр, мөгаен: «Менә бит янәшәбездә кемнәр яши!» – дип горурлангандыр. 

Казан шәһәрендә узачак турга (ул 4 нче  мартта булачак)   райондашларыбызның икесе дә – Олы Нырсы авылында яшәүче  Алексей Писарев   («Ир-ат - игелекле йөрәк» номинациясе)   һәм  Олы Мишәдән  Рузалия Газизова  («Хатын-кыз - ана» номинациясендә)  узды.  Аларны зур җиңүләре белән тәбрик итәбез һәм алдагы  турда да уңышлар телибез! 

Зөлфия Ибраһимова.