Теләче мәктәбе укучылары Анапага барачак

"Президент спорт уеннары" - Бөтенроссия мәктәп укучылары уеннарының региональ этабы финалы 27-29 май көннәрендә Зәй шәһәрендә узды.

Ярышларда Зәй, Яр Чаллы, Мөслим, Теләче, Саба, Ютазы, Азнакай, Актаныш, Мамадыш районнары командалары катнашты. Һәр командада 2006-2007 елгы 6 егет һәм 6 кыз бар. Спорт положениесе буенча команданы 7-8 сыйныф укучылары, муниципаль этап җиңүчеләре тәкъдим итәргә тиеш.

Безнең районны Теләче урта мәктәбе укучылары тәкъдим итте. Балаларны ике физик тәрбия укытучысы - Хәкимов Рафил Рефат улы һәм Сәлахиев Булат Ринат улы әзерләде.

Уеннар өч көн дәвамында барды һәм безнең  команда бик яхшы нәтиҗәләр күрсәттеләр:

Кызлар командасы волейбол буенча 1 урынны яулады.

Егетләр командасы: 

Өстәл теннисы буенча 1 урын:, 

Футбол буенча 1 урын:, 

2 урын җиңел атлетика буенча, 

3 урын волейбол буенча. 

Гомуми зачетта Теләче мәктәбе командасы "Президент спорт уеннары" Бөтенроссия мәктәп укучыларының спорт уеннарының региональ этабы финалында җиңү яулады һәм Анапа шәһәрендә узган Бөтенроссия этабында Татарстан Республикасы данын яклаячак. 

Команданы котлыйбыз, тренерларга әзерлекләре өчен рәхмәт белдерәбез һәм яңа уңышлар һәм җиңүләр телибез!